News - Daily Kesari

महाराष्ट्र

विठ्ठल-रुक्मिणीचा शाही विवाह सोहळा

Wrutuja pandharpure
03 Feb 2025

पंढरपुर, (प्रतिनिधी) : वसंत पंचमीच्या शुभ मुहूर्तावर विठ्ठल व रुक्मिणी मातेचा विवाह सोहळा परंपरेनुसार श्री विठ्ठल सभा मंडप येथे भक्तिमय वातावरणात रविवारी पार पडला. सोहळ्यासाठी भाविकांची मोठ्या प्रमाणात उपस्थिती होती.

सकाळी विठ्ठल रुक्मिणीमातेला शुभ्र वस्त्र तसेच रुक्मिणी मातेस मोत्याचे दागिने, नथ आणि अलंकार परिधान करण्यात आले होते. रुक्मिणी मातेच्या गर्भागृहातून गुलाल विठ्ठलाकडे नेण्यात आला. तिथे गुलालाची उधळण केल्यानंतर श्री विठ्ठलाचा गुलाल रुक्मिणी मातेकडे नेण्यात आला. तिथेही गुलालाची उधळण करण्यात आली. दुपारी १२ वाजता विठ्ठल रूक्मिणीमातेची पाद्यपूजा सह अध्यक्ष गहिनीनाथ महाराज औसेकर, सदस्य ज्ञानेश्वर देशमुख जळगावकर, संभाजी शिंदे, व्यवस्थापक मनोज श्रोत्री, लेखा अधिकारी मुकेश अनेचा यांच्या हस्ते पार पडली.विठ्ठल व रुक्मिणी मातेची अलंकाराने सजवलेली उत्सवमूर्ती या विवाह सोहळयाच्या ठिकाणी म्हणजे विठ्ठल सभामंडपातील फुलांनी सजविण्यात आलेल्या शाही मंडपात आणण्यात आली.

दोन्ही देवतास मुंडावळ्या बांधून आणल्या गेल्या. यानंतर अंतरपाट धरले आणि मंगलाष्टकास सुरवात झाली. मंदिर समितीचे सह अध्यक्ष गहिनीनाथ महाराज औसेकर यांनी मंगलाष्टका म्हटली. मंगलाष्टक झाल्यावर सर्व उपस्थित भाविकांनी शाही विवाह सोहळा साजरा केला. यावेळी मंदिर समितीमार्फत संत तुकाराम भवन येथे भोजनाची व्यवस्था भाविकांसाठी करण्यात आली होती. विवाह सोहळा पार पडल्यानंतर मोठ्या प्रमाणात भाविकांनी या प्रसादाचा लाभ घेतला,अशी माहिती मंदिर समितीची व्यवस्थापक मनोज श्रोत्री यांनी दिली.