News - Daily Kesari

महाराष्ट्र

माळशेज परिसरात बिबट्याच्या हल्ल्यात तिघे जखमी

Wrutuja pandharpure
03 Feb 2025

ओतूर, (वार्ताहर) : जुन्नर तालुक्यातील माळशेज परिसरात बिबट्याने केलेल्या हल्ल्यात तीन जण जखमी झाले असून, त्यांच्यावर उपचार सुरू आहेत.

रविवारी पिंपळगावजोगा येथील सुनील बबन निमसे (वय ४२) हे घराबाहेर असलेल्या शेडमध्ये झोपले असताना अचानक पहाटे ४.४५ च्या सुमारास बिबट्याने त्यांच्यावर हल्ला करून त्यांना जखमी केले.

दुसर्‍या घटनेत रोहोकडी येथील अभय विलास घोलप (१९) व चुलते रखमा सखाराम घोलप (६१) हे विद्युत पंप चालू करण्यासाठी दुचाकीवरून जात असता सकाळी ६.३० च्या सुमारास रस्त्याच्या बाजूला दबा धरून बसलेल्या बिबट्याने अचानक हल्ला करून त्यांना जखमी केले. जखमी व्यक्तींना तात्काळ ओतूर येथील आरोग्य केंद्रात प्राथमिक उपचार घेऊन पुढील उपचारासाठी मंचर येथील ग्रामीण रुग्णालय नेण्यात आले.

ओतूर वनपरिक्षेत्र अधिकार्‍यांनी घटनास्थळाची पाहाणी करून बिबट्याला पकडण्यासाठी पिंजरा लावण्याचे आश्वासन दिले. पहाटे उघड्यावर शौचालयास जाऊ नये, रात्री घराबाहेर झोपू नये व तसेच बिबट प्रवण क्षेत्रातून जात असताना वाहनाचे हॉर्न मोठ्याने वाजवणे, जेणेकरून रस्त्याच्या बाजूला दबा धरून बसलेले वन्यप्राणी त्याची जागा बदलतील, असे आवाहन वनविभागाने केले आहे.