पुणे : पुणे मेट्रोचा रुबी हॉल क्लिनिक ते रामवाडी हा मार्ग सुरू झाल्यावर दैनंदिन प्रवासी संख्येमध्ये निरंतर वाढ होताना दिसत आहे. जूनमध्ये दैनंदिन प्रवासी संख्या एक लाखापेक्षा जास्त होती, तर  ऑगस्ट मध्ये दैनंदिन प्रवासी संख्येमध्ये २० टक्के  वाढ दिसून आली आहे.

 

ऑगस्टमध्ये दैनंदिन प्रवासी संख्या १ लाख १८ हजार २४१ इतकी नोंदवण्यात आली आहे. या महिन्यात पुणे मेट्रोला ५ कोटी ६९ लाख रुपये  इतके उत्पन्न मिळाले आहे. दैनंदिन सरासरी उत्पन्न १८ लाख ६८ हजार इतके आहे.  एकूण प्रवासी संख्येची विभागणी केली असता पिंपरी चिंचवड महानगरपालिका ते जिल्हा न्यायालय या मार्गावर २९ टक्के  प्रवासी संख्या, तर रामवाडी ते वनाज या मार्गावर ७१ टक्के  प्रवासी संख्या निदर्शनास आली आहे.  पुणे मेट्रोचे तिकीट घेण्यासाठी ७० टक्के प्रवाशांनी डिजिटल मार्गाचा वापर केला, तर रोख रक्कम घेऊन तिकीट काढण्याची संख्या केवळ ३० टक्के आहे. डिजिटल माध्यमातून तिकीट घेणार्‍यांमध्ये पुणे मेट्रो भारतात सर्वात अग्रेसर आहे. डिजिटल माध्यमाद्वारे तिकीट घेतल्यामुळे कागदाची बचत होऊन पुणे मेट्रोच्या पर्यावरण पूरक उद्दिष्टांना मोठ्या प्रमाणात मदत होत आहे. डिजिटल माध्यमांची विभागणी केल्यास असे निदर्शनात आले की, डिजिटल किऑस्कद्वारे २० टक्के, तिकीट वेंडिंग मशीनद्वारे ६ टक्के , व्हॉट्स अपच्या माध्यमातून १८.८ टक्के , मोबाईल पच्या द्वारे ९.१७ टक्के  आणि महा मेट्रो कार्डद्वारे १३ टक्के लोकांनी मेट्रोचे तिकीट प्राप्त केले आहे.