प्रसिद्ध कृष्णा कसोटी मालिकेसाठी तंदुरुस्त   

नवी दिल्ली : भारतीय वेगवान गोलंदाज प्रसिद्ध कृष्णाला 19 नोव्हेंबरपासून न्यूझीलंडविरुद्ध सुरू होणार्‍या दोन सामन्यांच्या कसोटी मालिकेसाठी तंदुरुस्त घोषित करण्यात आले आहे. मालिकेतील पहिला कसोटी सामना 19 ते 23 नोव्हेंबरदरम्यान वेलिंग्टन येथे, तर दुसरा सामना 27 नोव्हेंबर ते 1 डिसेंबरदरम्यान क्राइस्ट चर्च येथे खेळवण्यात येणार आहे. प्रसिद्धच्या फिटनेसबाबत मिळालेल्या या सकारात्मक अपडेटमुळे भारतीय संघाला मोठा दिलासा मिळाला आहे.
 
डाव्या मांडीच्या मागील स्नायूला (हॅमस्ट्रिंग) दुखापत झाल्यामुळे प्रसिद्ध कृष्णाला मैदानाबाहेर राहावे लागले होते. या दुखापतीमुळे त्याला बुधवारपासून ऑकलंड येथे सुरू होणार्‍या पाच सामन्यांच्या वनडे मालिकेलाही मुकावे लागले होते. बीसीसीआयच्या सूत्राने दिलेल्या माहितीनुसार, प्रसिद्ध कृष्णाला आता पूर्णपणे फिट घोषित करण्यात आले असून न्यूझीलंडविरुद्धच्या आगामी कसोटी मालिकेसाठी तो उपलब्ध असेल.
 
न्यूझीलंड ’अ‘ विरुद्ध खेळण्याची शक्यता
 
दरम्यान, हा उजव्या हाताचा वेगवान गोलंदाज 7 ते 10 नोव्हेंबरदरम्यान लिंकन येथे भारत ‘अ’ आणि न्यूझीलंड ‘अ’ यांच्यात होणार्‍या तिसर्‍या अनौपचारिक चार दिवसीय कसोटी सामन्यातही खेळण्याची शक्यता आहे. या सामन्यातून त्याला कसोटी मालिकेपूर्वी सरावाची संधी मिळू शकते. प्रसिद्धला सुरुवातीच्या तीन सामन्यांसाठी संघात स्थान देण्यात आले होते. दुखापतीमुळे त्याला या मालिकेतून माघार घ्यावी लागली. 

Related Articles