मुलांचा गळा आवळून खून करणार्‍या आईला दुहेरी जन्मठेप   

पुरावा नष्ट केल्याप्रकरणी सक्तमजुरी 

पुणे : मुलांवरून पतीसोबत झालेल्या वादातून स्वतःच्या दोन चिमुरड्या मुलांचा दोरीने गळा आवळून निर्घृण खून करणार्‍या आईला जिल्हा सत्र न्यायालयाने दुहेरी जन्मठेपेची शिक्षा सुनावली. अतिरिक्त जिल्हा व सत्र न्यायाधीश एस. बी. भन्साळी यांनी हा महत्त्वपूर्ण निकाल दिला. जन्मठेपेसह दहा हजार रुपये दंड आणि पुरावा नष्ट केल्याप्रकरणी तीन वर्षांच्या सक्तमजुरीची शिक्षाही न्यायालयाने ठोठावली.
 
पूजा संजय सोळंकी (वय-28, रा. मेरिखेडा, ता. हरसोड, जि. खांडवा, मध्य प्रदेश) असे शिक्षा सुनावण्यात आलेल्या आरोपी महिलेचे नाव आहे. ही घटना 5 जानेवारी 2022 रोजी घडली होती. आरोपी महिलेने तिचा तीन वर्षांचा मुलगा चंदा आणि दोन वर्षांचा मुलगा आनंद या दोघांचा दोरीने गळा आवळून खून केला होता. या घटनेनंतर मुलांचे वडील संजय सोळंकी यांनी पौड पोलिस ठाण्यात फिर्याद दिली होती. त्यानुसार पोलिसांनी खुनाचा गुन्हा दाखल करून तपास सुरू केला. या प्रकरणाचा तपास पौड पोलिस ठाण्याचे तत्कालीन पोलिस निरीक्षक अशोक धुमाळ आणि त्यांच्या पथकाने केला होता. दरम्यान, न्यायालयात साक्ष नोंदविण्यापूर्वी तपास अधिकारी धुमाळ यांचे निधन झाले. त्यामुळे पौड पोलिस ठाण्यातील पोलिस कर्मचारी संजय शेंडगे यांनी न्यायालयात साक्ष नोंदविली.
 
खटल्याच्या सुनावणी-दरम्यान सरकारी पक्षाने सादर केलेले साक्षीपुरावे आणि अन्य पुरावे ग्राह्य धरून न्यायालयाने आरोपी महिलेला दोन्ही मुलांच्या हत्येप्रकरणी दुहेरी जन्मठेप व दहा हजार रुपये दंडाची शिक्षा सुनावली. दंडाची रक्कम न भरल्यास प्रत्येकी पाच महिने साधी कैद भोगावी लागणार आहे. तसेच पुरावा नष्ट केल्याच्या गुन्ह्यात तीन वर्षांची सक्तमजुरी आणि दोन हजार रुपये दंडाची शिक्षा सुनावण्यात आली आहे. सर्व शिक्षा एकत्रितपणे भोगण्याचे आदेशही न्यायालयाने दिले आहेत. या खटल्यात सरकारी पक्षातर्फे वकील विजय फरगडे आणि वकील अनिलकुमार वर्मा यांनी कामकाज पाहिले.

Related Articles