सरफराज खानची निवड प्रक्रियेवर नाराजी   

भारतीय संघ मला फक्‍त देशांतर्गत कसोटी सामन्यांसाठीच उपयुक्‍त मानतो

मुंबई : भारतीय क्रिकेट संघाचा मधल्या फळीतील फलंदाज सरफराज खान याने संघ निवड प्रक्रियेबाबत नाराजी व्यक्त केली आहे. भारतीय संघ व्यवस्थापन सध्या आपल्याला केवळ भारतीय खेळपट्ट्यांवरील कसोटी सामन्यांसाठीच उपयुक्त मानत असल्याचे त्याने म्हटले आहे. निवडकर्ते किंवा संघ व्यवस्थापनाकडून आपल्या भूमिकेबाबत कोणतीही स्पष्ट माहिती देण्यात आलेली नसल्याचेही त्याने सांगितले.रेल्वेविरुद्धच्या रणजी ट्रॉफी सामन्यात अवघ्या 55 चेंडूंमध्ये शतक झळकावल्यानंतर सरफराजने पत्रकारांशी संवाद साधला. यावेळी परदेश दौर्‍यांवर भारतीय संघात संधी न मिळण्याबाबत त्याने प्रश्न उपस्थित केले.
 
फेब्रुवारी 2024 मध्ये कसोटी क्रिकेटमध्ये पदार्पण करणार्‍या सरफराजने आतापर्यंत सहा कसोटी सामने खेळले आहेत. विशेष म्हणजे हे सर्व सामने भारतातच झाले आहेत. नुकत्याच झालेल्या श्रीलंका दौर्‍यासाठीही दुखापतग्रस्त साई सुदर्शनच्या जागी त्याची संघात निवड झाली होती. मात्र, अंतिम अकरा खेळाडूंमध्ये त्याला स्थान मिळाले नाही.परदेशातही आपण धावा केल्या असल्याचे सरफराजने स्पष्ट केले. दक्षिण आफ्रिकेत इंडिया ’अ’ संघाकडून खेळताना त्याने सराव सामन्यात 63 चेंडूंमध्ये शतक झळकावले होते. तर इंग्लंडमध्येही 76 चेंडूंमध्ये 101 धावांची खेळी केली होती.निवड समितीचा निर्णय हा त्यांचा दृष्टिकोन असल्याचे सांगत, आपले काम क्रिकेट खेळणे आणि धावा करणे एवढेच असल्याची प्रतिक्रिया सरफराजने दिली.

Related Articles