पश्चिम आशियातील संघर्षात २२ भारतीयांचा मृत्यू   

नवी दिल्ली : पश्चिम आशियात सुरू असलेल्या संघर्षात आतापर्यंत २२ भारतीय नागरिकांचा मृत्यू झाला आहे. त्यामध्ये १४ नाविकांचा समावेश आहे. परराष्ट्र मंत्रालयाचे प्रवक्ते रणधीर जयस्वाल यांनी पत्रकार परिषदेत ही माहिती दिली.
 
जयस्वाल म्हणाले, आखाती देशांतील भारतीय नागरिक आणि समुद्रावर कार्यरत असलेल्या नाविकांच्या सुरक्षेसाठी भारताची राजनैतिक मिशन संबंधित यंत्रणांच्या संपर्कात आहेत. भारतीय कामगार आणि नाविकांची सुरक्षा आणि  सुरक्षितता यासाठी पश्चिम आशियातील भारतीय राजनैतिक कार्यालये परिस्थितीवर बारकाईने लक्ष ठेवून आहेत. 
 
दरम्यान, सौदी अरेबियातील विमानसेवांमध्ये झालेल्या व्यत्ययामुळे प्रभावित भारतीय नागरिकांसाठी, विशेषतः उमराह यात्रेकरूंसाठी जेद्दा येथील भारतीय वाणिज्य दूतावासाने नव्या प्रवासविषयक सूचना जारी केल्या आहेत. भारतात परतण्यासाठी उपलब्ध अतिरिक्त विमानसेवांची माहितीही देण्यात आली आहे.
 
वाणिज्य दूतावासाच्या माहितीनुसार, जेद्दा आणि मदिना येथून सौदी एअरलाइन्ससह अन्य आंतरराष्ट्रीय विमान कंपन्यांची भारतासाठी उड्डाणे सुरू आहेत. तसेच, दम्माम आणि रियाध येथून फ्लायनासने लखनऊ, मुंबई, दिल्ली, हैदराबाद, कोझिकोड आणि कोची या शहरांसाठी अतिरिक्त विमानसेवा जाहीर केल्या आहेत.
 

Related Articles