ब्रेकिंग

मार्केटयार्डात ‘नो यूपीआय’आंदोलन यशस्वी

Wrutuja pandharpure
03 Oct 2026

पुणे : व्यापार्‍यांच्या आर्थिक व्यवहारांशी संबंधित विविध प्रश्नांकडे शासनाचे लक्ष वेधण्यासाठी शुक्रवारी मार्केट यार्डातील गूळ-भुसार विभागात ‘नो यूपीआय डे’ आंदोलन करण्यात आले. या आंदोलनाला व्यापार्‍यांचा उत्स्फूर्त प्रतिसाद मिळाला. व्यापार्‍यांच्या सहकार्यामुळे आंदोलन शंभर टक्के यशस्वी झाल्याची माहिती पूना मर्चंट्स चेंबरचे अध्यक्ष राजेंद्र बाठिया यांनी दिली.

या आंदोलनाच्या पार्श्वभूमीवर मार्केट यार्डातील गूळ-भुसार विभागातील अनेक व्यापार्‍यांनी यूपीआयद्वारे होणार्‍या डिजिटल पेमेंटचा स्वीकार न करता रोखीच्या व्यवहारांना प्राधान्य दिले. व्यापार्‍यांच्या प्रश्नांकडे शासनाचे लक्ष वेधण्यासाठी हे आंदोलन नाईलाजास्तव करावे लागले. व्यापार्‍यांच्या आर्थिक व्यवहारांवर अतिरिक्त भार निर्माण करणार्‍या निर्णयांबाबत शासनाने गांभीर्याने विचार करणे आवश्यक आहे. व्यापारी आणि ग्राहक यांच्यातील व्यवहार सुरळीत राहणे ही बाजारपेठेच्या दृष्टीने अत्यंत महत्त्वाची बाब आहे. मात्र, शासनाचे लक्ष वेधण्यासाठी आम्हाला ‘नो यूपीआय डे’ आंदोलनाचा मार्ग स्वीकारावा लागला.

या आंदोलनामध्ये चेंबरचे सर्व सभासद तसेच मार्केट यार्डातील अनेक व्यापारी सहभागी झाले होते. आंदोलनामुळे व्यापारी आणि ग्राहक या दोघांनाही काही प्रमाणात गैरसोयीचा सामना करावा लागला असून, त्याचा आर्थिक परिणामही झाल्याचे बाठिया यांनी नमूद केले.शासनाने व्यापार्‍यांच्या भावना व अडचणी लक्षात घेऊन यूपीआय व्यवहारांवर एमडीआर आकारणी करण्याचा निर्णय लवकरात लवकर मागे घ्यावा, अशी मागणी पूना मर्चंट्स चेंबरच्या वतीने करण्यात आली आहे. व्यापार्‍यांच्या हितासाठी शासनाने सकारात्मक भूमिका घेऊन या प्रश्नावर तातडीने तोडगा काढावा आणि भविष्यात व्यापारी व ग्राहक दोघांनाही अनावश्यक आर्थिक भार व गैरसोय होणार नाही, याची दक्षता घ्यावी, अशी अपेक्षाही राजेंद्र बाठिया यांनी व्यक्त केली.