ब्रेकिंग

विनर्स अकादमीची मिळकत अखेर सील

Wrutuja pandharpure
03 Oct 2026

आळंदी नगरपरिषदेची कारवाई; आवश्यक व्यवसाय परवाना व ना-हरकत प्रमाणपत्र नसल्याचे निदर्शनास

आळंदी, (वार्ताहर) : दिवेआगर येथे सहलीसाठी गेलेल्या आळंदीतील विनर्स अकादमीच्या आठ विद्यार्थ्यांचा बुडून मृत्यू झाल्याच्या दुर्दैवी घटनेनंतर आळंदी नगरपरिषद प्रशासनाने शहरातील कोचिंग क्लासेस व विविध आस्थापनांची तपासणी सुरू केली आहे. या तपासणीदरम्यान विनर्स अकादमीच्या मिळकतीवर कारवाई करत नगरपरिषदेच्या पथकाने संबंधित इमारत सील केली.

आळंदी नगरपरिषदेच्या पथकाने विनर्स अकादमीच्या इमारतीची प्रत्यक्ष पाहणी केली. यावेळी नारायण हरिभाऊ दस यांच्या मालकीची मालमत्ता या मिळकतीमध्ये विनर्स अकादमी कोचिंग क्लासेस सुरू असल्याचे आढळून आले.नगरपरिषदेच्या अभिलेखांची तपासणी केली असता सदर आस्थापनाने आवश्यक व्यवसाय परवाना अथवा ना-हरकत प्रमाणपत्र घेतल्याची नोंद आढळून आली नसल्याचे प्रशासनाने सांगितले. त्यामुळे लागू कायदे व नियमांनुसार आवश्यक कार्यवाही करण्याचे निर्देश देण्यात आले होते.

त्यानुसार मुख्याधिकारी माधव खांडेकर यांच्या आदेशानुसार कर विभाग प्रमुख सीमा चारवे यांच्या नेतृत्वाखाली नगरपरिषदेच्या पथकाने विनर्स अकादमीची सदर मिळकत सील करण्याची कारवाई केली. या कारवाईदरम्यान पोलीस प्रशासनाचे अधिकारी व कर्मचारी उपस्थित होते.दिवेआगर दुर्घटनेच्या पार्श्वभूमीवर आळंदी शहरातील संबंधित कोचिंग क्लासेस व आस्थापनांची पाहणी करण्यात येत असून, आवश्यक परवानग्या, नियमांचे पालन आणि सुरक्षिततेच्या बाबी तपासल्या जात आहेत.नगरपरिषद प्रशासनाच्या म्हणण्यानुसार, संबंधित आस्थापनांनी आवश्यक परवानग्या घेऊन नियमांचे पालन करावे आणि नगरपरिषदेच्या कायदेशीर तरतुदींची प्रभावी अंमलबजावणी व्हावी, या उद्देशाने ही कारवाई करण्यात आली आहे.