ब्रेकिंग

अर्थ

व्यावसायिक सिलिंडरच्या दरात वाढ

Samruddhi Dhayagude
02 Oct 2026

विमान प्रवासही महागणार

नवी दिल्ली : व्यावसायिक सिलिंडरच्या दरात पुन्हा एकदा वाढ झाली आहे. याचबरोबर, जेट इंधनाच्या किमतीत (एव्हिएशन टर्बाइन फ्युएल-एटीएफ) किमतीतही वाढ झाली आहे. त्यामुळे विमान प्रवास आणि घराबाहेरील जेवण महागणार आहे.हॉटेल आणि रेस्टॉरंटसाठी लागणार्‍या व्यावसायिक सिलिंडरच्या (१९ किलो) दरात ६२.५० रुपयांची वाढ करण्यात आली. तर, देशांतर्गत विमान कंपन्यांसाठी जेट इंधन किंवा एटीएफचा दर आता प्रति लीटर १२१ रुपयांवरून १३७ रुपये झाला आहे.

ऑगस्ट महिन्यात एटीएफच्या दरात प्रति लीटर पाच रुपये, सप्टेंबर महिन्यात ६.२६ रुपये (५.४६ टक्के) वाढ करण्यात आली होती. ऑक्टोबर महिन्यात यात तब्बल १६ रुपयांची वाढ झाली आहे. विमान कंपन्यांचा सर्वाधिक म्हणजे जवळपास ४० टक्के खर्च इंधनावर होतो. त्यामुळे हवाई प्रवास महागणार आहे.

व्यावसायिक सिलिंडरच्या दरात ६२.५९ रुपयांची वाढ करण्यात आली आहे. जुलै आणि ऑगस्ट महिन्यात अनुक्रमे १८३.५० आणि १९२ रुपयांची कपात करण्यात आली होती. तर, सप्टेंबर महिन्यात ९.५० रुपयांची वाढ करण्यात आली होती. मागील दोन महिन्यात व्यावसायिक सिलिंडरच्या दरात सुमारे ७२ रुपयांची वाढ झाली आहे.

पश्चिम आशियातील संघर्षाआधी व्यावसायिक सिलिंडर १,७४०.५० रुपये दराने मिळत होता. दरम्यानच्या काळात यात १,३७३ रुपयांची प्रचंड वाढ झाली. त्यामुळे जून महिन्यात व्यावसायिक सिलिंडर विक्रमी ३,११३.५० रुपयांवर पोहोचला होता. घरगुती सिलिंडरच्या दरात कोणताही बदल करण्यात आलेला नाही. त्यामुळे १४.२ किलोचा घरगुती सिलिंडरचा दर ९४२ रुपयांवर कायम आहे.घरगुती सिलिंडरच्या दरात ७ जून रोजी २९ रुपयांची वाढ करण्यात आली होती. त्याआधी, मार्च महिन्यात ६० रुपयांची वाढ करण्यात आली होती.