ब्रेकिंग

देश

जामिनावर सुटताच काँग्रेस उमेदवार प्रचारात

Samruddhi Dhayagude
02 Oct 2026

नंदिग्राम : पश्चिम बंगालमधील पूर्व मेदिनीपूर जिल्ह्यातील नंदिग्राम विधानसभा मतदारसंघाच्या पोटनिवडणुकीतील काँग्रेस उमेदवार मिलन प्रधान यांनी गुरुवारी प्रचारास सुरुवात केली. प्रधान यांची बुधवारी हंगामी जामिनावर सुटका करण्यात आली होती. पक्ष कार्यकर्त्यांसमवेत प्रधान यांनी स्थानिक काँग्रेस कार्यालयातून प्रचारास सुरुवात केली.

१९ वर्षांपूर्वीच्या प्रकरणात प्रधान यांना पश्चिम बंगाल पोलिसांनी नुकतीच अटक केली होती. कोलकाता उच्च न्यायालयाने बुधवारी प्रधान यांना २० ऑक्टोबरपर्यंत हंगामी जामीन मंजूर केला असून, २१ ऑक्टोबर रोजी स्थानिक न्यायालयात शरण जाण्यास सांगितले आहे.नुकत्याच पार पडलेल्या विधानसभा निवडणुकीत भाजप नेते सुवेंदू अधिकारी यांनी नंदिग्राम आणि भवानीपूरमधून विजय मिळविला होता. त्यानंतर, नंदिग्रामची जागा रिकामी केली होती. त्यामुळे नंदिग्रामसाठी पोटनिवडणूक होत आहे.

ममता बॅनर्जी यांच्या उमेदवाराने मुख्यमंत्री सुवेंदू अधिकारी यांची भेट घेतल्यानंतर माघार घेतली होती. त्यामुळे ममतांनी काँग्रेस उमेदवारास पाठिंबा दिला आहे.

नंदिग्रामसाठी अन्य काही जागांसाठी ६ ऑक्टोबर रोजी मतदान होणार असून, ९ ऑक्टोबर रोजी मतमोजणीनंतर निकाल जाहीर होणार आहेत.