ब्रेकिंग

क्रीडा

भारत-श्रीलंका सामन्यापूर्वी हवामानाची चिंता

Wrutuja pandharpure
01 Oct 2026

निशिन : आशियाई क्रीडा स्पर्धेतील पुरुष क्रिकेटच्या उपांत्य फेरीत गुरुवारी भारत आणि श्रीलंका आमनेसामने येणार आहेत. मात्र, या सामन्यापूर्वी खराब हवामान चर्चेचा विषय ठरले आहे. पावसामुळे दोन्ही संघांना उपांत्यपूर्व फेरीचे सामने खेळता आले नाहीत, तसेच सरावाची संधीही मिळाली नाही.नागोयात दाखल झाल्यापासून मुसळधार पावसामुळे भारतीय संघाला सराव करता आलेला नाही. उपांत्य सामन्यापूर्वी मात्र आकाश स्वच्छ झाले आहे. गुरुवार आणि शुक्रवारचे हवामानही अनुकूल राहण्याचा अंदाज आहे; मात्र शनिवारी होणार्‍या अंतिम सामन्यादिवशी पावसाची शक्यता आहे.

पावसामुळे चारही उपांत्यपूर्व सामने रद्द करण्यात आले होते. त्यामुळे आयसीसी क्रमवारीत वरच्या स्थानावरील संघांना उपांत्य फेरीत प्रवेश देण्यात आला. भारत आणि श्रीलंका यांच्यातील विजेता अंतिम फेरीत पाकिस्तान-बांगलादेश सामन्यातील विजेत्याशी भिडेल. सलग दोन टी-२० विश्वचषक जिंकणारा भारत सुवर्णपदकाचा दावेदार मानला जात आहे. श्रीलंकेचा संघ दुय्यम दर्जाचा असल्याने भारताला आव्हान तुलनेने कमी असेल. मात्र, पावसामुळे खेळपट्टी संथ होण्याची शक्यता असल्याने परिस्थितीशी लवकर जुळवून घेणे दोन्ही संघांसाठी महत्त्वाचे ठरणार आहे. भारताची आयसीसी क्रमवारीत पहिली, तर श्रीलंकेची नववी क्रमांकाची रँकिंग आहे. त्यामुळे उपांत्य सामना पावसामुळे रद्द झाल्यास भारत अंतिम फेरीत पोहोचेल. दुसरा उपांत्य सामना रद्द झाल्यास पाकिस्तान (६) बांगलादेश (८) पेक्षा वरच्या क्रमवारीमुळे अंतिम फेरीत जाईल. अंतिम सामनाही पावसामुळे होऊ शकला नाही, तर दोन्ही संघांना संयुक्त सुवर्णपदक दिले जाईल.