ब्रेकिंग

देश

व्याप्त काश्मीरमध्ये आंदोलन भडकले

Samruddhi Dhayagude
30 Sep 2026

स्थानिक नागरिक भारतात येण्यासाठी नियंत्रण रेषेकडे

नवी दिल्ली : व्याप्त काश्मीरमध्ये पाकिस्तानी सरकारविरोधातील आंदोलने तीव्र झाली आहेत. पाकिस्तानचे पंतप्रधान शहाबाज शरीफ आणि लष्करप्रमुख असीम मुनीर यांच्याविरोधात जोरदार घोषणा दिल्या जात आहेत. तसेच, हजारोच्या संख्येने स्थानिक नागरिक भारतात सामील होण्यासाठी नियंत्रण रेषेजवळ दाखल झाले आहेत.

व्याप्त काश्मीर हा पाकिस्तानचा भाग नाही, अशी घोषणा स्थानिकांकडून दिली जात आहे. मागील तीन महिन्यांपासून स्थानिकांनी पाकिस्तान सरकारविरोधात जोरदार लढा पुकारला आहे. व्याप्त काश्मीरमधील मंधोल गावात एका महासभेचे आयोजन करण्यात आले होते. नियंत्रण रेषेपासून अवघ्या ७ किलोमीटर अंतरावर पाकिस्तान सरकारविरोधात यावेळी जोरदार घोषणा देण्यात आल्या. या आंदोलनात २५ हजारांहून अधिक महिला आणि पुरुषांना सहभाग घेतला होता, असे वृत्त आहे.

या सभेत आवामी कृती समितीचे प्रमुख नेते सरदार अमन खान यांनी पाकिस्तानी लष्कर आणि तेथील प्रशासनाविरुद्ध थेट रणशिंग फुंकले. मागील तीन महिन्यांपासून पाकिस्तानने व्याप्त काश्मीरमधील जनतेचा रेशन पुरवठा पूर्णपणे रोखल्याचा आरोप करत, त्यांनी नियंत्रण रेषा कायमची हटवून जम्मू-काश्मीरमधील पूंछ आणि मेंढर भागात जाण्याची तयारी दर्शवली.

अमन खान यांनी पाकिस्तानी लष्कराच्या भ्याडपणाची पोलखोल केली. पूर्वी जेव्हा नियंत्रण रेषेवर गोळीबार व्हायचा, तेव्हा पाकिस्तानी सैनिक लपून बसायचे आणि स्थानिक नागरिक त्यांचे संरक्षण करायचे. परंतु, या संरक्षणाच्या बदल्यात पाकिस्तानी राजवटीने जनतेला फक्त बेरोजगारी, रुग्णालये व शाळांचा अभाव आणि हिंसाचार दिला. आपल्या मूलभूत हक्कांची मागणी करणार्‍या निष्पाप नागरिकांवर गोळीबार करून १०० हून अधिक जणांची हत्या करण्यात आली, असा आरोपही केला.