ब्रेकिंग

महाराष्ट्र

बुलेट ट्रेनचा पोलादी पूल ठाण्यात उभारला

Samruddhi Dhayagude
30 Sep 2026

वजन १ हजार ४०५ टन, १०० मीटर लांबी अणि १४ मीटर उंंच

ठाणे : केंद्र सरकारचा मुंबई ते अहमदाबाद हा महत्त्वाकांक्षी बुलेट ट्रेनचा प्रकल्प पुढे सरकत आहे. त्या अंतर्गत ठाणे जिल्ह्यातील भिवंडी परिसरातील राष्ट्रीय महामार्ग क्रमांक ३ वर दिवे-अंजूर गावात सोमवारी अवाढव्य पोलादी पूल उभारण्यात आला आहे.

पुलाचे वजन १ हजार ४०५ टन, लांबी १०० मीटर असून उंची १४ मीटर आहे. राज्यात बुलेट ट्रेन प्रकल्पाचा हा पूल आहे. हा पूल मुंबईपासून १ हजार ३०० किलोमीटरवरील तामिळनाडुतील त्रिचीतील कार्यशाळेत तयार केला होता. नंतर तो आणून तो निश्चित स्थळी बसविण्यात आला आहे. याबाबतची माहिती राष्ट्रीय अतिवेगवान रेल्वे महामंडळाने दिली. बुलेट ट्रेन धावणार्‍या मार्गावर २८ पूल उभारण्यात येणार आहे. त्यापैकी १६ पूल उभारले गेले आहेत. सर्व पूल त्रिचीतील विशेष कार्यशाळेत मेक इन इंडिया उपक्रमाअंतर्गत तयार केले आहेत. त्रिची येथून पुलाचे भाग आणले गेले आणि ठाण्यामध्ये ते जोडून आता उभारला आहे.

दरम्यान, मुंबई ते अहमदाबाद बुलेट ट्रेनचा प्रकल्प देशातील पहिला असून तो ५०८ किलोमीटरचा आहे. त्याद्वारे दोन शहरे आणि दोन राज्ये अनुक्रमे महाराष्ट्र आणि गुजरात जोडली जाणार आहेत. वेगवान प्रवासामुळे प्रवाशांचा वेळही वाचणार आहे.

प्रकल्प : बुलेट ट्रेन

मार्ग : मुंबई ते अहमदाबाद

अंतर : ५०८ किलोमीटर

पुलाची निर्मिती : त्रिची (तामिळनाडू)

बनावट : स्वदेशी, मेक इन इंडिया उपक्रम

एकूण पूल : २८

उभारले पूल : १६