ब्रेकिंग

महाराष्ट्र

निवडणूक आयोगाविरोधात ठाकरे बंधूंचा रविवारी मोर्चा

Samruddhi Dhayagude
30 Sep 2026

मुंबई, (प्रतिनिधी) : मुख्य निवडणूक आयुक्त ज्ञानेश कुमार यांचा मनमानी कारभार दोन आयुक्तांनीच समोर आणल्याने देशभरातील राजकारण तापले आहे. ठाकरे गटाचे प्रमुख उद्धव ठाकरे आणि मनसे अध्यक्ष राज ठाकरे ज्ञानेश कुमार यांच्या हकालपट्टीसाठी एकत्र लढा पुकारला असून, ४ ऑक्टोबरला (रविवारी) मुंबईत संयुक्त मोर्चा काढण्याची घोषणा केली आहे.

कोणत्याही राजकीय पक्षाच्या विरोधातील हा मोर्चा नसून, निवडणूक आयोगाच्या मागील काही वर्षांतील कारभाराविरोधातील मोर्चा आहे. लोकशाहीच्या रक्षणासाठी नागरिकांनी हातात तिरंगा घेऊन मोर्चात सहभागी व्हावे, असे आवाहन उद्धव व राज यांनी मंगळवारी संयुक्त पत्रकार परिषदेत केले. या मोर्चासाठी सर्व राजकीय पक्षांना निमंत्रित केले जाणार असून, सर्वांच्या हातात पक्षाचा झेंडा नाही तर केवळ तिरंगा असेल, असेही त्यांनी स्पष्ट केले.

ज्ञानेश कुमार यांच्याविरोधात संपूर्ण देशात संतापाचा उद्रेक झाला असून, विरोधकांकडून त्यांच्या राजीनाम्याच्या मागणीसाठी आंदोलन केले जात आहे. काँग्रेस पाठोपाठ आता ठाकरे बंधूंनी मैदानात उतरण्याचा निर्णय घेतला आहे. उद्धव आणि राज यांनी काल ’शिवतीर्थ’ येथे संयुक्त पत्रकार परिषद घेऊन मोर्चाची रूपरेषा स्पष्ट केली.

४ ऑक्टोबर रोजी सकाळी १० वाजता भायखळा येथून मोर्चाला सुरुवात होणार असून, तो फोर्ट येथील मुंबई महापालिका मुख्यालयाच्या दिशेने जाणार आहे. महापालिकेसमोर मोर्चाचे सभेत रूपांतर होईल. या सभेत आयोगाच्या कारभाराबाबत सविस्तर भूमिका मांडली जाणार असल्याचे राज यांनी सांगितले.