ब्रेकिंग

खेडकर यांच्या मालमत्तांवर एसीबीचे छापे

Samruddhi Dhayagude
30 Sep 2026

पाथर्डी (वार्ताहर) : निवृत्त सनदी अधिकारी तथा महाराष्ट्र प्रदूषण नियंत्रण मंडळाचे माजी प्रादेशिक अधिकारी दिलीप खेडकर यांच्या भालगाव येथील निवासस्थानासह विविध मालमत्तांवर एसीबीने काल (मंगळवारी) पहाटे छापे टाकले. २०१२ मध्ये अहिल्यानगर येथील पंढरीनाथ साबळे यांनी खेडकर यांच्या मालमत्तेबाबत तक्रार केली होती. त्यानंतर झालेल्या चौकशीच्या आधारे एसीबीच्या पोलिस निरीक्षक सविता तांबे यांनी काल पाथर्डी पोलिस ठाण्यात तक्रार दाखल केली.

एफआयआरनुसार १९९५ ते डिसेंबर २०२३ या कालावधीत खेडकर कुटुंबाचे ज्ञात उत्पन्न १३ कोटी २ लाख ७८ हजार रुपये, तर खर्च १५ कोटी ३३ लाख ७४ हजार रुपये असल्याचे नमूद आहे. ज्ञात मालमत्तेचे मूल्य १० कोटी ९९ लाख ८५ हजार रुपये असल्याचेही म्हटले आहे. उत्पन्नाच्या तुलनेत मालमत्ता व खर्चात कथित तफावत आढळल्याने खेडकर व पत्नी मनोरमा यांच्याविरुद्ध गुन्हा दाखल करण्यात आला आहे. ३० हून अधिक अधिकारी-कर्मचार्‍यांनी अनेक तास झाडाझडती घेतली. तपास उपअधीक्षक अजित त्रिपुटे करीत आहेत