ब्रेकिंग

पाथर्डीच्या पूर्व भागात जोरदार पाऊस

Samruddhi Dhayagude
30 Sep 2026

पाथर्डी (वार्ताहर) : तालुक्यावर दुष्काळाचे सावट असताना सोमवारी दुपारी चिंचपूर पांगुळ, वडगाव, जोगेवाडी, मानेवाडी व ढाकणवाडी परिसरात सुमारे तासभर जोरदार पाऊस झाला. त्यामुळे नदी-नाले वाहू लागले असून बेलपारा तलावातही पाण्याची आवक झाली. पावसामुळे दुष्काळाच्या झळा सोसणार्‍या शेतकर्‍यांना काहीसा दिलासा मिळाला.

तालुक्यात यंदा पावसाने ओढ दिल्याने खरीप पिकांचे मोठे नुकसान झाले आहे. पिण्याच्या पाण्याची टंचाई निर्माण झाल्याने अनेक गावांना टँकरने पाणीपुरवठा सुरू आहे. तसेच चार्‍याची कमतरता भासत असून, दर वाढले आहेत.दरम्यान, सोमवारी झालेल्या पावसामुळे काही ठिकाणी काढणी केलेले बाजरीचे पीक भिजल्याने नुकसान झाले. पूर्व भागातील पावसामुळे तालुक्यातील इतर भागातील शेतकर्‍यांच्या आशा पल्लवित झाल्या असून, नवरात्रोत्सवात सर्वदूर पाऊस पडून दुष्काळाची तीव्रता कमी व्हावी, अशी अपेक्षा व्यक्त होत आहे.