ब्रेकिंग

गुन्हेगारी जगत

म्हणून सियासोबतचे प्रेमसंबंध तोडले

Samruddhi Dhayagude
30 Sep 2026

प्रियकराचा आरोपपत्रात खुलासा

पुणे : केतन अग्रवाल हत्याकांडाच्या तपासात आता सिया गोयलच्या जुन्या प्रेमसंबंधांपासून ते साक्षीदारांना धमकावल्याच्या आरोपांपर्यंत अनेक गंभीर बाबी समोर आल्या आहेत. पोलिसांनी न्यायालयात दाखल केलेल्या आरोपपत्रातून सियाच्या शाळकरी वयातील एका माजी प्रियकराचा जबाब तपासाचा भाग झाल्याचे उघड झाले आहे. सिया दहावीत असताना तिचे एका तरुणासोबत प्रेमसंबंध होते. मात्र, पुढे सिया चेतन चौधरीच्या प्रेमात पडल्याचे समजल्यानंतर आपण तिच्याशी संबंध तोडल्याचे माजी प्रियकराने पोलिसांना दिलेल्या जबाबात नमूद केल्याचे आरोपपत्रातून समोर आले आहे.

केतन अग्रवाल हत्याकांडात सिया गोयल आणि चेतन चौधरी यांची नावे समोर आल्यानंतर सियाच्या जुन्या संबंधांची माहितीही पोलिस तपासात नोंदविण्यात आली आहे. या जुन्या प्रेमसंबंधांचा हत्याकांडाशी थेट संबंध आहे की नाही, हे अद्याप स्पष्ट झालेले नसले तरी तपासाच्या दृष्टीने या जबाबाची नोंद महत्त्वाची ठरली आहे.

साक्षीदारांच्या सुरक्षेचा गंभीर प्रश्न

केतनला लोहगडावरील दरीत ढकलताना पाहिल्याचा दावा करणार्‍या एका प्रत्यक्षदर्शी साक्षीदाराला चेतन चौधरीने धमकी दिल्याचे आरोपपत्रात नमूद आहे. याशिवाय ‘माही’ किंवा ‘माहीरा’ या नावाने इन्स्टाग्रामवरील एका महिला साक्षीदारालाही चेतनकडून धमकावण्यात आल्याचा दावा पोलिस तपासात करण्यात आला आहे. महिलेचा जबाबही पोलिसांनी नोंदविल्याचे आरोपपत्रातून स्पष्ट होते. प्रत्यक्षदर्शी साक्षीदाराला धमकी आणि समाज माध्यम अकाउंटच्या माध्यमातून महिला साक्षीदाराला लक्ष्य करण्यात आल्याने या प्रकरणातील साक्षीदारांच्या सुरक्षेचा मुद्दा पुन्हा ऐरणीवर आला आहे.

सियाचे इतर तरुणांशी संबंध

केतनचे वडील विशाल अग्रवाल यांनी सिया गोयलचे केवळ चेतन चौधरीसोबतच नव्हे, तर अन्य काही तरुणांसोबतही संबंध असल्याचा दावा केला आहे. या संबंधांचा केतनच्या हत्येशी काही संबंध आहे का, या दिशेनेही तपास करण्याची आवश्यकता असल्याचे त्यांनी म्हटले आहे. तसेच सियाच्या कुटुंबीयांची या संपूर्ण प्रकरणात कोणती भूमिका होती किंवा आहे, याचाही तपास करण्याची मागणी त्यांनी केली आहे. मात्र, या दाव्यांना स्वतंत्रपणे न्यायालयीन निष्कर्ष मिळालेला नसून, ते तपासातील आरोप आणि संबंधित व्यक्तींच्या दाव्यांच्या स्वरूपातच पाहावे लागणार आहेत.

डिजिटल पुराव्यांचा आधार

या हत्याकांडाच्या तपासात डिजिटल संवाद, समाज माध्यम अकाउंट्स आणि अन्य इलेक्ट्रॉनिक पुराव्यांची पोलिसांनी छाननी केल्याचे आरोपपत्रातून समोर आले आहे. संबंधित व्यक्तींमधील संवाद, समाज माध्यम हालचाली आणि उपलब्ध इलेक्ट्रॉनिक पुराव्यांच्या आधारे तपासाची दिशा निश्चित करण्यात आल्याचे दिसून येते. जुन्या प्रेमसंबंधांचा तपास, साक्षीदारांना धमकावल्याचे आरोप, समाज माध्यम अकाउंटचा वापर आणि लोहगडावरील हत्याकांड या सर्व बाबी आता तपासाच्या कक्षेत आल्या आहेत.

आरोपपत्रानंतर तपासाला नवे वळण

केतन अग्रवाल हत्याकांडात पोलिसांनी दाखल केलेल्या आरोपपत्रामुळे प्रकरणातील अनेक बाबी नव्याने चर्चेत आल्या आहेत. विशेषतः सियाच्या जुन्या संबंधांबाबत नोंदविण्यात आलेला माजी प्रियकराचा जबाब आणि साक्षीदारांना धमकावल्याचे आरोप यामुळे तपासातील गुंतागुंत वाढली आहे. दरम्यान, आरोपपत्रात नमूद करण्यात आलेल्या आरोपांची अंतिम सत्यता न्यायालयीन प्रक्रियेत ठरणार आहे. मात्र, या नव्या तपशीलांमुळे केतनच्या मृत्यूमागील नेमका घटनाक्रम, संबंधित व्यक्तींच्या भूमिका आणि साक्षीदारांवरील दबाव यांचा तपास कोणत्या दिशेने जातो, याकडे आता सर्वांचे लक्ष लागले आहे.