ब्रेकिंग

सह्याद्रीच्या कुशीत रंगला रानफुलांचा पुष्पोत्सव

Samruddhi Dhayagude
29 Sep 2026

अकोले (वार्ताहर) : तालुक्यातील सह्याद्री डोंगररांग सध्या रंगीबेरंगी रानफुलांनी बहरली असून, सर्वत्र जणू फुलांचा गालीचा पसरल्याचे मनोहारी दृश्य पहायला मिळत आहे. पूर्व पावसाळ्यात काजव्यांचा काजवोत्सव, पावसाळ्यात धबधब्यांचा जलोत्सव आणि पावसाळ्यानंतर आता पुष्पोत्सवाने सह्याद्रीचे सौंदर्य खुलले आहे. फोफसंडी, हरिश्चंद्रगड, भंडारदरा, विश्रामगड तसेच कळसूबाई-हरिश्चंद्रगड अभयारण्य परिसरात सप्टेंबरपासून सुरू झालेला हा फुलोत्सव आता पूर्ण बहरात आला आहे.

दर्‍या-खोर्‍या, रानवाटा, डोंगरमाथे आणि कड्याकपारी हिरवाईने नटल्या असून, त्यावर विविध रंगांची फुले उमलली आहेत. तेरडा अर्थात गुलमेंहदी, हळदी-कुंकू, कारवी, घाणेरी आणि अग्निशिखा ही फुले पर्यटकांचे विशेष आकर्षण ठरत आहेत. तेरड्याच्या लाल, गुलाबी व पांढर्‍या गुच्छांनी रतनवाडी, घाटघर आणि भंडारदरा परिसर खुलला आहे. कारवीचे जांभळे सौंदर्य सह्याद्रीचे वैशिष्ट्य मानले जाते तर अग्निशिखा हे दुर्मिळ, औषधी तसेच विषारी फूल आहे.

याशिवाय सोनकी, निसुर्डी, रानहळद, सीतेची आसवे, रानतूर, श्वेतांबर, सोनसरी, कुसुंबी, लाजाळू आदी असंख्य रानफुलांनी परिसर सजला आहे. फुलांवर मधमाशा, भुंगे आणि रंगीबेरंगी फुलपाखरांची गर्दी वाढली आहे. हा निसर्गोत्सव पाहण्यासाठी पर्यटक व वनस्पतीशास्त्राचे विद्यार्थी मोठ्या संख्येने दाखल होत आहेत.पर्यटकांनी फुले तोडू नयेत, त्यांना पायदळी तुडवू नये तसेच प्लॅस्टिक व कचरा टाकून निसर्गाची हानी करू नये, असे आवाहन करण्यात आले आहे.