ब्रेकिंग

महाराष्ट्र

भीमाशंकर कारखान्याकडून ऊस उत्पादकांना साखर वाटप

Samruddhi Dhayagude
29 Sep 2026

मंचर, (वार्ताहर) : पारगाव येथील भीमाशंकर सहकारी साखर कारखान्यामार्फत माजी सहकारमंत्री दिलीप वळसे-पाटील यांच्या मार्गदर्शनाखाली प्रतिवर्षाप्रमाणे यंदाही दीपावलीनिमित्त सभासद व ऊस उत्पादकांना गाव व गटनिहाय साखर वाटप करण्यात येणार आहे. २ ते १० ऑक्टोबर या कालावधीत सकाळी १० ते सायंकाळी ५ या वेळेत प्रतिकिलो २० रुपये दराने साखरेचे वाटप करण्यात येणार असल्याची माहिती कारखान्याचे अध्यक्ष बाळासाहेब बेंडे यांनी दिली.

पूर्ण शेअर्स (१५ हजार रुपये) व ऊस पुरवठा केलेले सभासदांना ८० किलो, केवळ पूर्ण शेअर्स असलेल्या सभासदांना ५० किलो, अपूर्ण शेअर्स व ऊस पुरवठा केलेल्यांना ४० किलो, केवळ ऊस पुरवठा केलेल्यांना ४० किलो, तर केवळ अपूर्ण शेअर्सची रक्कम जमा केलेल्यांना ३० किलो साखर देण्यात येणार आहे. साखरेचे वाटप १०, २० व ५० किलो पॅकिंगमध्ये करण्यात येणार आहे. गावनिहाय व तारखेनिहाय साखर वाटपाचे नियोजन करण्यात आले आहे. सभासद व ऊस उत्पादकांनी नियोजित तारखेला साखर घेऊन जाऊन सहकार्य करावे, असे आवाहन कारखान्याचे उपाध्यक्ष प्रदीप वळसे पाटील यांनी केले आहे.