ब्रेकिंग

देश

काँग्रेसची आज कार्यकारिणी बैठक

Samruddhi Dhayagude
29 Sep 2026

नवी दिल्ली : काँग्रेस अध्यक्ष मल्लिकार्जुन खर्गे यांनी आज (मंगळवारी) पक्षाच्या कार्यकारिणीची बैठक बोलावली आहे. या बैठकीत निवडणूक आयोगातील अंतर्गत मतभेदाच्या मुद्द्यावर चर्चा केली जाईल. तसेच, मुख्य निवडणूक आयुक्त ज्ञानेश कुमार यांना पदावरून हटवण्याबाबतची पुढील व्यूहरचना निश्चित केली जाईल.

निवडणूक आयोगातील दोन आयुक्तांनीच कामकाजातील बाबी उघड केल्या आहेत, असे खर्गे म्हणाले. नवीन मतदार नोंदण्यासाठी असलेल्या अर्ज क्रमांक ६ मध्ये केलेले बदल ’बेकायदा’ व ’अनधिकाराने’ केले आहेत. (हा) युवकांना त्रास देण्याचा प्रकार आहे, अशा शब्दांत या आयुक्तांनी आपला आक्षेप नोंदवला होता. हा मुद्दा अत्यंत गंभीर असून, तो लोकशाहीच्या अस्तित्वाशी निगडित आहे आणि त्याकडे प्राधान्याने लक्ष देणे गरजेचे आहे, असे खर्गे यावेळी म्हणाले. ज्ञानेश कुमार यांनी राजीनामा दिला पाहिजे. तसेच, त्यांच्याविरुद्ध कायदेशीर कारवाई झाली पाहिजे, असेही खर्गे म्हणाले.

या बैठकीस पक्षाचे ज्येष्ठ नेते राहुल गांधी, सरचिटणीस प्रियांका गांधी वाड्रा, जयराम रमेश आणि के. सी. वेणुगोपाल यासह इतर नेते उपस्थित राहण्याची शक्यता आहे.