ब्रेकिंग

क्रीडा

हॉकीत बांगला देशचा १०-० ने धुव्वा पाकिस्तानची आता भारताशी उपांत्यफेरीत गाठ

Samruddhi Dhayagude
29 Sep 2026

नागोया : आशियाई क्रीडा स्पर्धेतील पुरुष हॉकीच्या उपांत्य फेरीत भारत आणि पाकिस्तान आमनेसामने येणार आहेत. भारताने सोमवारी बांगलादेशचा १०-० असा दणदणीत पराभव करत पूल-ए मध्ये अव्वल स्थान पटकावले. भारताचा हा स्पर्धेतील सलग पाचवा विजय ठरला. आता १ ऑक्टोबरला नागोया येथे भारत-पाकिस्तान यांच्यात उपांत्य फेरीचा सामना होणार आहे.

बांगलादेशविरुद्ध भारताने सुरुवातीपासूनच आक्रमक खेळ केला. तिसर्‍याच मिनिटाला अभिषेकने रिव्हर्स स्कूपच्या माध्यमातून गोल करत भारताचे खाते उघडले. दुसर्‍या क्वार्टरमध्ये जुगराज सिंहने पेनल्टी स्ट्रोकवर गोल केला, तर कर्णधार हरमनप्रीत सिंहने पेनल्टी कॉर्नरचे गोलमध्ये रूपांतर करत भारताची आघाडी ३-० केली.

तिसर्‍या क्वार्टरमध्ये भारताने सामन्यावर पूर्ण वर्चस्व मिळवले. सुखजीत सिंहने मैदानी गोल केला. त्यानंतर हरमनप्रीतने आणखी दोन गोल करत आपली हॅट्ट्रिक पूर्ण केली. शिलानंद लाकडानेही दोन गोल करत भारताच्या आघाडीत भर घातली. तिसरा क्वार्टर संपेपर्यंत भारताने ८-० अशी आघाडी घेतली होती. अखेरच्या क्वार्टरमध्ये संजय आणि मनदीप सिंह यांनी गोल करत भारताचा विजय १०-० असा निश्चित केला.

सामन्यादरम्यान जोरदार पाऊस झाल्याने खेळाला सुमारे ३० मिनिटांचा विलंब झाला. भारताचा गोलरक्षक सूरज करकेरा याने या सामन्यात १००वा आंतरराष्ट्रीय सामना पूर्ण केला.भारत आणि पाकिस्तान यांच्यात आशियाई क्रीडा स्पर्धेच्या इतिहासात यापूर्वी अनेक रोमांचक लढती झाल्या आहेत. यंदाच्या स्पर्धेपूर्वी २०२६च्या हॉकी विश्वचषकातही दोन्ही संघ आमनेसामने आले होते. त्या सामन्यात भारताने पाकिस्तानचा ५-३ असा पराभव केला होता. आता आशियाडच्या उपांत्य फेरीत पुन्हा एकदा दोन्ही पारंपरिक प्रतिस्पर्धी भिडणार असल्याने या सामन्याकडे हॉकीप्रेमींचे लक्ष लागले आहे.