ब्रेकिंग

विदेश

इंग्लंडमधील अमेरिकन हवाई तळाजवळची घरे केली रिकामी

Samruddhi Dhayagude
28 Sep 2026

लंडन : इंग्लंडमधील एका अमेरिकन हवाई तळाजवळ पोलिसांनी अनेक घरे रिकामी केली असून, स्फोटकांशी संबंधित गुन्ह्यांच्या संशयावरून काही जणांना ताब्यात घेतले आहे. पश्चिम इंग्लंडमधील व्हेलफोर्ड परिसरात ही कारवाई करण्यात आली.

व्हेलफोर्डमधील अनेक मालमत्ता खबरदारीचा उपाय म्हणून रिकाम्या करण्यात येत आहेत. हा परिसर आरएएफ फेअरफोर्ड या अमेरिकी लष्कराकडून वापरल्या जाणार्‍या हवाई तळाच्या जवळ आहे. स्फोटकांशी संबंधित गुन्हे केल्याच्या संशयावरून या परिसरातील अनेक व्यक्तींना ताब्यात घेण्यात आले आहे. या कारवाईदरम्यान लष्कराच्या बॉम्ब निकामी पथकातील तज्ज्ञांना घटनास्थळी पाचारण करण्यात आले आहे.

बॉम्बविरोधी तज्ज्ञांकडून परिसरातील अनेक वाहनांची तपासणी करण्यात येत आहे. पोलिसांकडून परिस्थितीचा तपास सुरू असून, नागरिकांच्या सुरक्षिततेसाठी परिसरातील काही मालमत्ता रिकाम्या करण्यात आल्या आहेत. दरम्यान, आरएएफ फेअरफोर्डचा अमेरिकी लष्कराकडून वापर केला जातो. या हवाई तळाचा वापर इराणसोबतच्या युद्धाच्या काळातही करण्यात आला आहे.