ब्रेकिंग

देश

छत्तीसगढमध्ये पुरात अडकलेल्या पाच हजार जणांची सुटका

Samruddhi Dhayagude
28 Sep 2026

जगदलपूर : छत्तीसगढमध्ये मुसळधार पावसामुळे नद्यांना पूर आल्यानंतर गेल्या दोन दिवसांत सुमारे पाच हजार नागरिकांची सुटका करण्यात यश मिळाले. १६ जणांना हेलिकॉप्टरद्वारे सुरक्षित स्थळी हलवण्यात आले, अशी माहिती अधिकार्‍यांनी रविवारी दिली. दरम्यान, धमतरी येथील एका दुकानातून वाहून जाणार्‍या मद्याच्या बाटल्या स्थानिक नागरिक ोळा करत असल्याचे चित्रफितीत दिसून आले.

बस्तर भागात महामार्गावर अडकलेल्या सहा मालमोटार चालकांची आणि त्यांच्या मदतनीसांनी सुटका करण्यात आली. ते वाहनांच्या छतावर अडकले होते. धमतरी जिल्ह्यात वेगवेगळ्या घटनांमध्ये वाहून गेल्यामुळे दोन व्यक्ती बेपत्ता आहेत; तसेच बिलासपूर जिल्ह्यात दुथडी भरून वाहणार्‍या अर्पा नदीत अंघोळ करताना दोन मुले वाहून गेली, त्यापैकी एकाचा मृतदेह सापडला आहे, असेही त्यांनी सांगितले.

पावसाचा जोर ओसरला असला तरी, वरच्या भागातून येणार्‍या पाण्यामुळे आणि धरणांमधून सोडलेल्या पाण्यामुळे नद्या व ओढ्यांच्या पाणी पातळीत वाढ झाली आहे. यामुळे विशेषतः बस्तर आणि लगतच्या भागांत पूरसदृश परिस्थिती अधिक गंभीर झाली आहे, असे अधिकार्‍यांनी नमूद केले.

बस्तर जिल्ह्यात गेल्या २४ तासांत एक हजाराहून अधिक नागरिकांची सुटका करून त्यांना मदत छावण्यांमध्ये हलवण्यात आले आहे.काल सकाळी डोंगाघाट भागात अडकलेल्या १६ जणांची हेलिकॉप्टरच्या साहाय्याने सुटका करण्यात आली, असेही त्यांनी सांगितले. प्रशासनाने जिल्ह्यातील शहरी आणि ग्रामीण भागांत ४३ मदत छावण्या उभारल्या आहेत, तेथे पाच हजाराहून अधिक नागरिकांच्या निवारा, अन्न आणि इतर आवश्यक सुविधा पुरवल्या जात आहेत, असे अधिकार्‍याने सांगितले.

शनिवारी रात्री ८ वाजेपर्यंत इंद्रावती नदीची पाणी पातळी १२.५६ मीटरपर्यंत पोहोचली होती, जी धोक्याच्या पातळीपेक्षा ४.२६ मीटर अधिक आहे. पाणी पातळी वाढल्यामुळे सखल आणि नदीकाठच्या वस्त्यांमध्ये सतर्कता वाढवण्यात आली आहे; तसेच संवेदनशील भागांवर चोवीस तास लक्ष ठेवण्याचे आणि गरज पडल्यास लोकांना सुरक्षित स्थळी हलवण्याचे निर्देश क्षेत्रीय पथकांना देण्यात आले आहेत, असे त्यांनी सांगितले.