ब्रेकिंग

पाकिस्तानात उत्पादन झालेल्या क्रीमची पिंपरीत विक्री

Samruddhi Dhayagude
28 Sep 2026

जप्तीची कारवाई

पिंपरी : भारतात विक्रीस प्रतिबंधित असलेल्या मेड इन पाकिस्तान नमूद केलेल्या गोरी ब्यूटी क्रीमची पिंपरीतील दुकानातून विक्री होत असल्याचा प्रकार उघडकीस आला आहे. पिंपरी-चिंचवड पोलिसांच्या दहशतवाद विरोधी शाखेने रिव्हररोड परिसरात कारवाई करून १२ हजार ६५० रुपये किंमतीच्या २३ क्रीम जप्त केल्या.

प्रकाश मनोहरलाल गुरू (३९, रा. गेलार्ड चौक, पिंपरी) याच्याविरोधात पिंपरी पोलिस ठाण्यात गुन्हा दाखल करण्यात आला आहे. गोरी ब्यूटी क्रीमच्या भारतातील कंपनीचे अधिकृत तपासणी अधिकारी रईसोदीन इनामदार यांनी याप्रकरणी फिर्याद दिली आहे.

रिव्हर रोडवरील पीएमपीएमएल बस थांब्याजवळ असलेल्या शक्ती कॉस्मेटिक्स दुकानात ’मेड इन पाकिस्तान’ नमूद असलेल्या आणि भारतात विक्रीस परवानगी नसलेल्या बनावट गोरी ब्यूटी क्रीमची विक्री होत असल्याची माहिती दहशतवाद विरोधी शाखेला मिळाली होती. त्यानुसार, एटीबीच्या पथकाने पिंपरी पोलिसांच्या मदतीने दुकानात कारवाई केली. तपासणीदरम्यान दुकानात प्रत्येकी ५५० रुपये किंमतीच्या २३ क्रीम आढळून आल्या. त्यांची एकूण किंमत १२ हजार ६५० रुपये आहे. याप्रकरणी भारतीय न्याय संहितेच्या कलम ३१८ (४) तसेच कॉपीराइट कायद्याच्या कलम ५१ आणि ६३ अन्वये गुन्हा दाखल करण्यात आला आहे.

पाकिस्तानातील वस्तूंवर भारतात बंदी

केंद्र सरकारच्या वाणिज्य आणि उद्योग मंत्रालयाच्या २ मे २०२५च्या अधिसूचनेनुसार पाकिस्तानातून भारतात सर्व प्रकारच्या वस्तूंच्या आयातीवर बंदी आहे. पिंपरी-चिंचवड पोलिस आयुक्तालयाच्या हद्दीत ’मेड इन पाकिस्तान’ नमूद असलेल्या वस्तूंची विक्री होत असल्याचे आढळल्यास नागरिकांनी दहशतवाद विरोधी शाखेशी संपर्क साधावा, असे आवाहन पोलिसांनी केले आहे.