ब्रेकिंग

रूग्णालयावरील कारवाई टाळण्यासाठी वैद्यकीय अधिकार्‍याकडून २० लाखांची मागणी

Samruddhi Dhayagude
28 Sep 2026

३० हजारांची लाच स्वीकारताना जाळ्यात

पुणे : विश्रांतवाडी-धानोरी परिसरातील खासगी रुग्णालयावर कायदेशीर कारवाई टाळण्यासाठी २० लाख रुपयांची लाच मागून त्यातील ३० हजार रुपये स्वीकारताना पुणे महापालिकेच्या नगर रस्ता क्षेत्रीय कार्यालयातील वैद्यकीय अधिकार्‍याला लाचलुचपत प्रतिबंधक विभागाने सापळा रचून (एसीबी) रंगेहाथ पकडले.

डॉ. ज्ञानेश्वर शिवराम चकोर (वय ५०, रा. शुभ गेटवे सोसायटी, विमाननगर) असे वैद्यकीय अधिकार्‍याचे नाव आहे. महिला डॉक्टरने एसीबीकडे तक्रार दिली होती. तिचे धानोरी परिसरात खासगी रुग्णालय आहे. या रुग्णालयातील कथित अनियमिततेबाबत महापालिकेकडे तक्रार करण्यात आली होती. त्याची चौकशी करण्याची जबाबदारी डॉ. चकोर यांच्याकडे सोपविण्यात आली होती. त्यानुसार, १८ सप्टेंबर रोजी ते रुग्णालयात चौकशीसाठी गेले. त्यानंतर अहवाल वरिष्ठ वैद्यकीय अधिकार्‍यांकडे सादर करावा लागेल. रुग्णालयात त्रुटी आढळल्यास नोंदणी रद्द होऊ शकते, अशी भीती दाखवत कारवाई टाळण्यासाठी २० लाख रुपयांची मागणी केल्याचे तक्रारीत नमूद आहे.

यानंतर डॉ. चकोर यांनी तक्रारदार महिला डॉक्टरकडून १५ हजार रुपये स्वीकारले. त्यानंतर आणखी ३० हजार रुपये घेण्यासाठी त्यांनी तिला नगर रस्ता क्षेत्रीय कार्यालयात बोलाविले. दरम्यान, महिलेने एसीबीकडे तक्रार केल्यानंतर अधिकार्‍यांनी पडताळणी केली आणि शनिवारी नगर रस्ता क्षेत्रीय कार्यालयातील डॉ. चकोर यांच्या दालनाच्या परिसरात सापळा लावला.

यावेळी ३० हजार रुपयांची लाच स्वीकारताना एसीबीच्या पथकाने डॉ. चकोर यांना रंगेहाथ पकडले. याप्रकरणी त्यांच्याविरुद्ध भ्रष्टाचार प्रतिबंधक कायद्यान्वये विश्रांतवाडी पोलिस ठाण्यात गुन्हा दाखल झाला आहे. पोलिस अधीक्षक डॉ. शिरीष सरदेशपांडे, अतिरिक्त अधीक्षक अजित पाटील यांच्या मार्गदर्शनाखाली उपअधीक्षक नीता मिसाळ, सतीश वाळके, हवालदार प्रवीण तावरे, अश्विन कुमकर, वनिता गोरे आणि चंद्रकांत कदम यांच्या पथकाने ही कारवाई केली.