ब्रेकिंग

क्रीडा

तिरंदाजीत भारताचा दबदबा

Samruddhi Dhayagude
28 Sep 2026

चारही संघ उपांत्य फेरीत

आयची-नागोया : आशियाई क्रीडा स्पर्धा २०२६ मध्ये तिरंदाजीत भारताने दमदार कामगिरी करत पुरुष व महिला कंपाउंड संघांसह मिश्र कंपाउंड आणि रिकर्व संघांचीही उपांत्य फेरी गाठली. सर्फिंगमध्येही तीन भारतीय खेळाडूंनी आपापल्या लढती जिंकून पुढील फेरीत प्रवेश केला.

कंपाउंड मिश्र संघात चिकिथा तानिपार्थी आणि साहिल जाधव यांनी उपउपांत्यपूर्व फेरीत मंगोलियाचा १६०-१४६ असा पराभव केला. त्यानंतर उपांत्यपूर्व फेरीत कझाकिस्तानवर १५९-१५४ अशी मात करत उपांत्य फेरी गाठली. रिकर्व मिश्र संघातील धीरज बोम्मादेवरा आणि कुमकुम अनिल मोहोद यांनीही प्रभावी कामगिरी केली. भारतीय जोडीने यूएईचा ६-० असा पराभव केल्यानंतर उपांत्यपूर्व फेरीत व्हिएतनामलाही ६-० ने हरवले.

पुरुष, महिला कंपाउंड संघही अंतिम चारमध्ये

ज्योती सुरेखा वेन्नम, चिकिथा तानिपार्थी आणि पृथिका प्रदीप यांच्या महिला संघाने उपांत्यपूर्व फेरीत कझाकिस्तानचा २३३-२३० असा पराभव केला. पुरुष संघानेही भूतानवर २३५-२३२ अशी मात केली. त्याआधी महिला संघाने मंगोलियाला २३८-२२३, तर पुरुष संघाने यूएईला २३५-२१५ असे हरवले होते. दोन्ही भारतीय संघांचा उपांत्य फेरीत दक्षिण कोरियाशी सामना होणार असून पदकाच्या लढती ३० सप्टेंबरला होतील. कंपाउंड मिश्र संघाची स्पर्धा महत्त्वाची असून, एलए२८ ऑलिम्पिकमध्ये या प्रकाराचा प्रथमच समावेश होणार आहे. आशियाई क्रीडा स्पर्धेतून या प्रकारासाठी एक ऑलिम्पिक कोटा उपलब्ध आहे. सर्फिंगमध्ये शुगर शांती गायेन आणि कमली प्रकाश यांनी महिलांच्या शॉर्टबोर्ड प्रकारातील आपापल्या हीट जिंकून तिसर्‍या फेरीत प्रवेश केला. शुगर शांतीने ७.३३ गुणांची नोंद करत चायनीज तैपेईच्या चेन वान-यूचा (५.४०) पराभव केला.