ब्रेकिंग

पैठणीवर आता बारकोड

Samruddhi Dhayagude
01 Sep 2026

असली-नकलीची होणार ओळख

पंढरपूर, (प्रतिनिधी) : पैठणी साडीची अस्सलता ग्राहकांना सहज ओळखता यावी आणि बनावट पैठणीच्या विक्रीला आळा बसावा, यासाठी शासनाने पैठणीवर बारकोड छापण्याचा निर्णय घेतला आहे. या बारकोडच्या माध्यमातून पैठणी खरी आहे की खोटी, याची माहिती ग्राहकांना मिळण्यास मदत होणार असल्याची माहिती राज्याचे वस्त्रोद्योग मंत्री संजय सावकारे यांनी दिली.

वस्त्रोद्योग मंत्री संजय सावकारे यांनी रविवारी पंढरपूर येथे श्री विठ्ठल-रुक्मिणी मातेचे दर्शन घेतले. दर्शनानंतर त्यांनी माध्यमांशी संवाद साधताना वस्त्रोद्योग क्षेत्रातील विविध विषयांवर माहिती दिली.

पैठणी ही महाराष्ट्राची पारंपरिक आणि वैशिष्ट्यपूर्ण ओळख असून, तिच्या नावावर बाजारात बनावट साड्यांची विक्री होत असल्याच्या तक्रारी येतात. त्यामुळे ग्राहकांची फसवणूक होऊ नये तसेच अस्सल पैठणी तयार करणार्‍या विणकर व उत्पादकांना योग्य मोबदला मिळावा, यासाठी शासनाने बारकोडची संकल्पना पुढे आणली आहे.

पैठणीवर छापण्यात येणार्‍या बारकोडमुळे संबंधित साडीची ओळख आणि अस्सलतेची पडताळणी करण्यास मदत होणार आहे. त्यामुळे ग्राहकांना पैठणी खरेदी करताना अधिक विश्वासार्हता मिळेल, तसेच अस्सल पैठणीच्या बाजारपेठेला चालना मिळण्याची अपेक्षा आहे.

महाराष्ट्रातील पैठणी उद्योग हा अनेक विणकर, कारागीर आणि वस्त्रोद्योगाशी संबंधित कुटुंबांच्या उदरनिर्वाहाचे साधन आहे. पारंपरिक हातमागावर तयार होणार्‍या अस्सल पैठणीला बाजारपेठेत योग्य स्थान मिळावे, यासाठी शासनाच्या या निर्णयाला महत्त्व प्राप्त झाले आहे.सावकारे यांच्या या घोषणेमुळे पैठणी खरेदी करणार्‍या ग्राहकांना मोठा दिलासा मिळणार असून, अस्सल पैठणी आणि बनावट पैठणीतील फरक स्पष्ट होण्यास मदत होणार आहे.