ब्रेकिंग

क्रीडा

सूर्यवंशीची 92 धावांची झंझावाती खेळी

Wrutuja pandharpure
01 Sep 2026

दुलीप ट्रॉफी

बेंगळुरू : युवा फलंदाज वैभव सूर्यवंशीने 92 धावांची आक्रमक खेळी करत लाल चेंडूच्या क्रिकेटमधील आपली क्षमता पुन्हा सिद्ध केली. मात्र, दुलीप ट्रॉफी उपांत्य फेरीच्या दुसर्‍या दिवशी पूर्व विभागाला मध्य विभागावर पहिल्या डावात आघाडी घेता आली नाही. डावखुरा फिरकीपटू हर्ष दुबेने 66 धावांत 4, तर वेगवान गोलंदाज यश ठाकूरने 66 धावांत 3 आणि आर्यन पांडेने 43 धावांत 3 बळी घेत पूर्व विभागाचा डाव 266 धावांत संपविला. मध्य विभागानेही पहिल्या डावात 266 धावा केल्याने दोन्ही संघांची पहिल्या डावातील धावसंख्या समान राहिली.

15 वर्षांच्या सूर्यवंशीने दुलीप ट्रॉफीमध्ये अर्धशतक झळकावणारा सर्वांत युवा फलंदाज होण्याचा विक्रम केला. त्याने 1969 मध्ये 16 व्या वर्षी हा पराक्रम करणार्‍या लक्ष्मण सिंहचा विक्रम मोडला. सूर्यवंशीने 81 चेंडूंत 92 धावांची खेळी करताना अनेक आकर्षक फटके खेळले. हर्ष दुबेच्या गोलंदाजीवर मोठा फटका खेळण्याच्या प्रयत्नात तो 92 धावांवर बाद झाला आणि शतकाची संधी हुकली. त्याने अभिमन्यू ईश्वरनसोबत पहिल्या विकेटसाठी 161 धावांची भक्कम भागीदारी केली. ईश्वरनने 69 धावा केल्या. सूर्यवंशी बाद झाल्यानंतर पूर्व विभागाची फलंदाजी कोलमडली. पूर्व विभागाने अखेर केवळ 105 धावांत सर्व 10 विकेट गमावत 266 धावांवर डाव संपविला.

तिलकच्या शतकाने दक्षिण विभागाला आघाडी

कर्णधार तिलक वर्माने कठीण खेळपट्टीवर संयमी आणि झुंजार शतक झळकावत दक्षिण विभागाला दुलीप ट्रॉफीच्या उपांत्य फेरीत महत्त्वपूर्ण आघाडी मिळवून दिली. उत्तर विभागाविरुद्धच्या सामन्यात दक्षिण विभागाने दुसर्‍या दिवसअखेर 9 बाद 285 धावा केल्या असून, पहिल्या डावात त्यांना 90 धावांची आघाडी मिळाली आहे.तिलकने 219 चेंडूंमध्ये शतक पूर्ण केले. दिवसअखेर तो 106 धावांवर नाबाद होता. दक्षिण विभागाचे अवघ्या 80 धावांत पाच फलंदाज माघारी परतले होते. श्रेयस गोपालने 88 धावांची संयमी खेळी करत तिलकसोबत 175 धावांची महत्त्वपूर्ण भागीदारी केली. त्याआधी उत्तर विभागाचा पहिला डाव 195 धावांत संपुष्टात आला.