ब्रेकिंग

विदेश

उत्तर कोरियाच्या संरक्षण क्षेत्रात मोठे फेरबदल

Samruddhi Dhayagude
31 Aug 2026

किम जोंग यांनी संरक्षण मंत्र्यांना पदावरुन हटविले

प्योंगयांग : इंडो-पॅसिफिक क्षेत्रात वाढत्या तणावादरम्यान उत्तर कोरियाचे सर्वोच्च नेते किम जोंग उन यांनी सैन्यात मोठे फेरबदल केले आहेत. या नव्या बदलांतर्गत संरक्षण मंत्री नो क्वांग चोल यांना त्यांच्या पदावरून हटवण्यात आले असून, लष्कराच्या उच्च पदांवर नवीन अधिकार्‍यांच्या नियुक्त्या करण्यात आल्या आहेत.

हा बदल स्ट्रक्चरल रि-ऑर्गनायझेशन प्लॅन अंतर्गत करण्यात आला आहे. किम जोंग उन यांच्या अध्यक्षतेखाली नुकत्याच झालेल्या एका महत्त्वाच्या बैठकीत हा निर्णय घेण्यात आला. या कारवाईत नो क्वांग चोल यांना केवळ संरक्षण मंत्री पदावरूनच हटवले नाही, तर सत्ताधारी पक्षातील त्यांचे पद आणि रँकही कमी करण्यात आली आहे. त्यांना आता आर्मामेंट इंडस्ट्री डिपार्टमेंटचे फर्स्ट डेप्युटी डायरेक्टर अशी जबाबदारी देण्यात आली आहे. त्यांच्या जागी कोरियन पीपल्स आर्मीच्या जनरल पॉलिटिकल ब्युरोचे संचालक किम सोंग-गी यांची नवीन संरक्षण मंत्री म्हणून नियुक्ती करण्यात आली आहे. याव्यतिरिक्त, वरिष्ठ अधिकारी आणि संरक्षण सल्लागार पाक जोंग-चोन यांना सेंट्रल मिलिटरी कमिशनचे उपाध्यक्ष बनवण्यात आले असून त्यांना सत्ताधारी पक्षाच्या पॉलिटिकल ब्युरोमध्येही समाविष्ट करण्यात आले आहे.

या लष्करी फेरबदलांसोबतच किम जोंग उन यांनी एका वेगळ्या कार्यक्रमात देशातील आघाडीचे शास्त्रज्ञ आणि अधिकार्‍यांची भेट घेतली. नवीन लढाऊ शस्त्र प्रणाली विकसित करण्यात शास्त्रज्ञांनी दिलेल्या महत्त्वपूर्ण योगदानाबद्दल त्यांचे विशेष कौतुक करण्यात आले आणि त्यांना देशाच्या सर्वोच्च राष्ट्रीय पुरस्काराने सन्मानित करण्यात आले. दरम्यान, उत्तर कोरियाच्या सैन्यातील हे सर्व बदल अमेरिका आणि दक्षिण कोरिया यांच्यातील संयुक्त लष्करी सराव नुकताच संपल्यानंतर लगेचच करण्यात आले आहेत.