ब्रेकिंग

आरोग्य विभागाला सुविधांची प्रतीक्षा

Samruddhi Dhayagude
31 Aug 2026

पिंपरी : पिंपरी-चिंचवड महापालिकेच्या ‘ग’ व ‘ड’ क्षेत्रीय कार्यालयांसह विविध आरोग्य विभागांत कार्यरत कर्मचार्‍यांना आवश्यक मूलभूत सुविधा मिळत नसल्याचे चित्र आहे. नागरिकांच्या आरोग्याची जबाबदारी सांभाळणार्‍या कर्मचार्‍यांनाच आवश्यक साधनसामग्री, स्वच्छ कार्यस्थळ, आर्थिक तरतूद आणि पायाभूत सुविधांचा अभाव जाणवत असल्याने कर्मचार्‍यांमध्ये नाराजी आहे. महापालिकेच्या आरोग्य विभागामार्फत शहरातील स्वच्छता, कचरा व्यवस्थापन, डास नियंत्रण, रोगप्रतिबंधक उपाययोजना, सार्वजनिक आरोग्य तपासणी यांसह विविध कामे केली जातात. मात्र ही कामे करणार्‍या कर्मचार्‍यांना पुरेशा सुविधा उपलब्ध नसल्यास त्याचा परिणाम कामाच्या गुणवत्तेवर आणि पर्यायाने नागरिकांच्या आरोग्यावर होण्याची शक्यता आहे.

महापालिका नागरिकांना दर्जेदार आरोग्य सुविधा देण्याचा दावा करत असताना त्या सुविधा प्रत्यक्षात पोहोचविणार्‍या कर्मचार्‍यांच्या मूलभूत गरजांकडेही गांभीर्याने लक्ष देणे आवश्यक आहे. कर्मचार्‍यांना आवश्यक निधी, साधने आणि पायाभूत सुविधा वेळेत उपलब्ध करून देण्याबरोबरच सर्व क्षेत्रीय कार्यालये व आरोग्य विभागांची नियमित पाहणी करावी. तेथील त्रुटी दूर करून कर्मचार्‍यांच्या समस्या तातडीने सोडवाव्यात, अशी मागणी जोर धरत आहे.

यासंदर्भात महापालिकेचे आरोग्य निरीक्षक सुरज कुंभार म्हणाले, आरोग्य कर्मचार्‍यांना सुरक्षा साधने पालिकेच्या नियमानुसार दिले जातात काही कर्मचारी हे कचरा वेचक व इतर ठेकेदाराच्या अंतर्गत काम करतात त्यांना ठेकेदारांनी सुरक्षा साहित्य व साधने पुरवणे आवश्यक असून त्या संदर्भात सूचना दिल्या जातील.