ब्रेकिंग

बाजारात पालेभाज्यांचा सुकाळ

Samruddhi Dhayagude
30 Aug 2026

वाहतूक खर्चही निघेना; शेतकरी आर्थिक संकटात

पुणे : पावसाने उघडीप दिल्यामुळे विविध प्रकारच्या पालेभाज्यांची बाजारात दुप्पटीने आवक वाढली आहे. मात्र आवकेच्या तुलनेत मागणी वाढली नसल्यामुळे दरात मोठी घसरण झाली आहे. मिळणार्‍या दरातून वाहतूक खर्चही निघत नसल्यामुळे शेतकरी आर्थिक संकटात सापडले आहेत.

पोषक वातावरणामुळे यंदा पालेभाज्यांचे उत्पादन मोठ्या प्रमाणात वाढले आहे. त्याचाच परिणामी म्हणून मार्केटयार्डातील भाजीपाला विभागात पालेभाज्यांची मोठ्या प्रमाणात आवक होत आहे. पालेभाज्यांना मागणी वाढत नसल्यामुळे घाऊक बाजारात कवडीमोल दराने भाज्यांची विक्री होत आहे. नेहमीचा तुलनेत निम्माच दर मिळत आहे. आवक मात्र दुप्पट झाली आहे. सर्वच पालेभाज्यांच्या जुडीचे भाव घाऊक बाजारात १० रुपये अथवा त्यापेक्षा कमी आहेत. परिणामी, वाहतुक, उत्पादन खर्च मिळत नसून, शेतकर्‍यांना नुकसानीला सामोरे जावे लागत आहे. त्यामुळे पालेभाज्या उत्पादक शेतकरी हवालदिल झाला आहे. सर्व प्रकारच्या पालेभाज्यांच्या जुडीची किरकोळ बाजारात १० ते २० रुपये दराने विक्री होत आहे.

मार्केट यार्ड येथील घाऊक बाजारात सद्य:स्थितीत पुणे जिल्ह्यातून पालेभाज्यांची आवक होत आहे. सर्वाधिक कोथिंबिरीची आवक होत आहे. शुक्रवारी बाजारात तब्बल २ लाख जुडी आवक झाली होती. त्या खालोखाल मेथीची ७० हजार ते ८० हजार जुडी, पालकची २० हजार जुडी, शेपूची ४० हजार जुडी, पुदीना आणि कांदापातची प्रत्येकी १५ ते २० हजार जुडी आवक झाली. तर उर्वरित पालेभाज्यांची १० हजार जुडीपेक्षा कमी आवक झाली.

घटलेले दर कायम राहतील

मागील काही दिवसांपासून मार्केट यार्डात पालेभाज्यांची आवक नेहमीच्या तुलनेत दुप्पट झाली आहे. त्या तुलनेत मागणी कमी असल्यामुळे भाज्यांच्या दरात मोठी घसरण झाली आहे. वाढलेली आवक कायम राहणार असल्याने पुढील काही दिवस हीच परिस्थिती कायम राहणार असल्याचा अंदाज आहे.

- राजेंद्र सुर्यवंशी, पालेभाज्यांचे व्यापारी, मार्केट यार्ड