ब्रेकिंग

विदेश

पाकिस्तानात ११ बंडखोर ठार

Samruddhi Dhayagude
28 Aug 2026

बलुचिस्तान, खैबर पख्तूनख्वामध्ये सुरक्षा दलांची कारवाई

इस्लामाबाद : पाकिस्तानच्या बलुचिस्तान आणि खैबर पख्तूनख्वा प्रांतांत सुरक्षा दलांनी ११ बंडखोरांना ठार केले. या कारवायांमध्ये ‘तेहरिक-ए-तालिबान पाकिस्तान’ (टीटीपी) आणि अन्य बंडखोर गटांच्या सदस्यांना लक्ष्य करण्यात आल्याची माहिती सरकारी माध्यमांनी गुरुवारी दिली.

दोन्ही प्रांतांतील विविध ठिकाणी या कारवाया करण्यात आल्या. बलुचिस्तानमधील सासूल भागात चार बंडखोर ठार झाले. खैबर पख्तूनख्वामधील बन्नू जिल्ह्यात दोन, तर दक्षिण वझिरीस्तान जिल्ह्यात टीटीपीच्या पाच बंडखोरांचा खात्मा करण्यात आला.सासूल भागात बंडखोरांना लक्ष्य करण्यासाठी ड्रोनचा वापर करण्यात आल्याचे सुरक्षा दलांनी सांगितले. या कारवायांचा नेमका कालावधी सरकारी माध्यमांनी स्पष्ट केलेला नाही; मात्र गेल्या काही दिवसांत या कारवाया करण्यात आल्याचे सांगण्यात आले. पाकिस्तानचे अध्यक्ष आसिफ अली झरदारी यांनी यशस्वी कारवाईबद्दल सुरक्षा दलांचे कौतुक केले. परदेशी मदतीने सक्रिय असलेल्या बंडखोर घटकांचा खात्मा करणे राष्ट्रीय सुरक्षेसाठी आणि दीर्घकालीन शांततेसाठी आवश्यक असल्याचे त्यांनी म्हटले. पंतप्रधान शहबाज शरीफ यांनीही सुरक्षा दलांच्या कारवाईचे स्वागत केले. दहशतवादाविरोधातील लढ्यात संपूर्ण देश सुरक्षा कर्मचार्‍यांच्या पाठीशी असल्याचे त्यांनी सांगितले.

दरम्यान, बलुचिस्तान आणि खैबर पख्तूनख्वा येथे मागील आठवड्यात ४९ बंडखोर ठार झाले होते. गेल्या काही वर्षांत पाकिस्तानमध्ये, विशेषतः बलुचिस्तान आणि खैबर पख्तूनख्वा प्रांतांत, बंडखोरांच्या कारवायांमध्ये वाढ झाली आहे.