ब्रेकिंग

झाडाला खिळे ठोकून बांधला फलक

Wrutuja pandharpure
28 Aug 2026

पर्यावरण प्रेमी आंदोलनाच्या तयारीत

लोहगाव : लोहगाव हरणतळ जवळील सर्वे नंबर 35 मधील गायरानवस्तीत एक धक्कादायक आणि निसर्गाची क्रूर थट्टा करणारा प्रकार उघडकीस आला आहे. तहसीलदार यांच्या आदेशाचे पालन करताना स्थानिक तलाठ्याने शासकीय माहितीचा लोखंडी फलक थेट एका झाडाला खिळे ठोकून आणि पत्रा घट्ट बांधून लावल्याचे समोर आले आहे. प्रशासनाच्या या बेजबाबदार कृत्यामुळे संबंधित झाडाचा जीव अक्षरशः घुटमळत असून, पर्यावरणप्रेमी आणि स्थानिक नागरिकांमधून तीव्र संताप व्यक्त होत आहे.

गायरान जमिनीवरील सर्वे नंबर 35 मध्ये महसूल विभागाने अधिकृत फलक लावण्याचे आदेश दिले होते. मात्र, हे आदेश राबवताना कर्मचार्‍यांनी पर्यावरणाचे नियम धाब्यावर बसवले. लोखंडी पत्रा झाडाच्या खोडाला अत्यंत निर्दयीपणे जखडण्यात आला आहे. यामुळे झाडाच्या नैसर्गिक वाढीला बाधा निर्माण झाली असून ते हळूहळू सुकण्याची भीती निर्माण झाली आहे. या गंभीर प्रकाराकडे स्थानिक महसूल प्रशासनाचे पूर्णपणे दुर्लक्ष झाले आहे.

या संतापजनक प्रकारानंतर स्थानिक पर्यावरण समिती आणि नागरिक आक्रमक झाले आहेत. गोरख साळवे, संजय मूलभारती, श्याम सदाफुले, लिंबा कावरे, सुनील पंडित, हरीश दंडाले, शामवेल कोल्हे, प्रकाश चव्हाण, रजनी सहारे, कृष्णा कोल्हे, सविता विटकर आणि युवराज कसबे या प्रमुख नागरिकांनी घटनास्थळाची पाहणी करून प्रशासनाचा निषेध केला.शासकीय फलक लावण्यासाठी झाडाचा बळी देणे अत्यंत चुकीचे आहे. प्रशासनाने तात्काळ तो पत्रा हटवून झाडाची मुक्तता करावी आणि निष्काळजी कर्मचार्‍यांवर कठोर कारवाई करावी. अन्यथा आम्ही सर्व नागरिक तहसीलदार कार्यालयासमोर तीव्र आंदोलन छेडू, असा इशारा पर्यावरण समितीच्या सदस्यांनी दिला आहे.