ब्रेकिंग

सैनिकांसाठी पद्मश्री राहीबाईंच्या बीज-राख्या

Samruddhi Dhayagude
28 Aug 2026

अकोले (वार्ताहर) : राखीपौर्णिमेनिमित्त विषमुक्त गावरान बियाण्यांच्या संवर्धनासाठी प्रसिद्ध बीजमाता पद्मश्री राहीबाई पोपेरे यांनी देशाच्या सीमेवर लढणार्‍या सैनिकांसाठी तसेच बंधूस्थानी मानलेल्या मंत्री चंद्रकांत पाटील यांच्यासाठी यंदाही स्वतःच्या हाताने बीज-राख्या तयार करून पाठविल्या आहेत. या उपक्रमातून त्यांनी देशबांधवांना पर्यावरण रक्षण व अन्नसुरक्षेचा संदेश दिला.

कोंभाळणे येथे राहीबाईंनी कुटुंबीय व नातवंडे सायली आणि धनश्री यांच्या मदतीने या पर्यावरणपूरक राख्या तयार केल्या. भात, नागली, वरई, तूर, मूग, उडीद, वाल, काकडी, घोसाळी व भोपळा आदी पारंपरिक बियाण्यांचा वापर करून राख्या साकारण्यात आल्या. राखी बांधल्यानंतर तिच्यातील बीज जमिनीत रुजवून त्यातून पीक किंवा भाजीपाला उगवावा, हा या उपक्रमामागील संकल्प आहे.महाराष्ट्रातील हजारो शेतकर्‍यांपर्यंत गावरान बियाणे पोहोचविणार्‍या राहीबाई सैनिकांप्रती कृतज्ञता व्यक्त करण्यासाठी दरवर्षी बीज-राख्या पाठवितात.रक्षाबंधनाच्या कौटुंबिक भावनेसोबत बीज-राखीतून पर्यावरण संवर्धन, विषमुक्त अन्न आणि राष्ट्रबांधणीचा संदेश देण्याचा प्रयत्न असल्याचे त्यांनी सांगितले. या अनोख्या उपक्रमाचे सर्वत्र कौतुक होत आहे.