ब्रेकिंग

टाकळीभानचा टेलटँक पूर्ण क्षमतेने भरला

Samruddhi Dhayagude
27 Aug 2026

टाकळीभान (वार्ताहर) : श्रीरामपूर तालुक्यातील टाकळीभानसह परिसरासाठी वरदान ठरलेला टाकळीभान टेलटँक (गोविंदसागर) पूर्ण क्षमतेने भरल्याने शेतकरी व ग्रामस्थांमध्ये आनंदाचे वातावरण आहे. टेलटँकच्या सांडव्यातून पाणी पाझर तलावाकडे झेपावले असून, लवकरच तोही भरण्याची शक्यता आहे. 1972 च्या दुष्काळात माजी कृषिमंत्री कै. गोविंदराव आदिक यांच्या प्रयत्नातून या टेलटँकची निर्मिती झाली. 197 दशलक्ष घनफूट साठवण क्षमता असलेल्या या टेलटँकमुळे परिसरातील सात ते आठ गावांतील शेतीला सिंचनाचा लाभ होतो. तसेच अनेक गावांच्या पाणीपुरवठा योजनांनाही त्याचा फायदा होतो.भंडारदरा व निळवंडे धरणे पूर्ण भरल्याने प्रवरा नदीत सोडण्यात आलेले ओव्हरफ्लोचे पाणी कालव्याद्वारे टेलटँकमध्ये सोडण्यात आले. जलसंपदा विभागाच्या अधिकार्‍यांच्या मार्गदर्शनाखाली कर्मचार्‍यांनी पंधरा दिवस परिश्रम घेतल्याने टेलटँक भरला. त्यामुळे शेतकर्‍यांना रब्बी पिकांचे नियोजन करता येणार असून त्यांनी जलसंपदा विभागाचे आभार मानले.