ब्रेकिंग

देश

उत्तर प्रदेशात अतिदक्षतेचा इशारा कायम

Samruddhi Dhayagude
28 Aug 2026

कुशीनगर : नेपाळमधील महापुरामुळे उत्तर प्रदेश आणि बिहारमध्ये नद्यांची पाणीपातळी वाढण्याचा धोका निर्माण झाला आहे. या पार्श्वभूमीवर उत्तर प्रदेशातील महाराजगंज आणि कुशीनगर जिल्हा प्रशासनाने अतिदक्षतेचा इशारा कायम ठेवला आहे. नेपाळमधील पुरामुळे गंडक (नारायणी) नदीच्या पाणीपातळीत वाढ होण्याची शक्यता आहे. या पार्श्वभूमीवर प्रशासनाला पूर्णपणे सावध राहण्याचे निर्देश देण्यात आले आहेत. तसेच, बचाव आणि मदत पथके तैनात करण्यात आली आहेत.

उत्तर प्रदेशाची काही सीमा नेपाळशी जोडली असून, तेथील त्रिशुली नदीला अचानक आलेल्या पुरामुळे गंडक नदीच्या तिरावरील भागात भीतीचे वातावरण निर्माण झाले आहे. उत्तर प्रदेश सरकार गंडक नदीच्या पाणीपातळीवर बारकाईने लक्ष ठेवून आहे.