नवी दिल्ली : ‘तहलका’चे संपादक तरुण तेजपाल यांना दोन आठवड्यांत शरण येण्याचे निर्देश मंगळवारी सर्वोच्च न्यायालयाने दिले. २०१३ मधील बलात्कार प्रकरणात मुंबई उच्च न्यायालयाने तेजपाल यांना १० वर्षांची सक्त कारावासाची शिक्षा सुनावली होती. या शिक्षेला तेजपाल यांनी सर्वोच्च न्यायालयात आव्हान दिले आहे. तसेच, शरण येण्यापासून सवलत मिळावी, अशी विनंती केली होती. न्यायमूर्ती आलोक आराध्ये यांच्यासमोर हा अर्ज सुनावणीसाठी आहे. न्यायालयाने तेजपाल यांची शरण येण्यासंदर्भातील विनंती फेटाळून लावली. तर, दोषसिद्धी आणि शिक्षेला आव्हान देणार्‍या अर्जावर २२ सप्टेंबर रोजी सुनावणी होईल, असे स्पष्ट केले. मात्र, त्याआधी शरण आल्याबाबतचे प्रमाणपत्र २२ सप्टेंबरपूर्वी सादर करावे लागेल, असेही न्यायालयाने स्पष्ट केले. तेजपाल यांना पाच वर्षांपूर्वी गोवा सत्र न्यायालयाने निर्दोष ठरविले होते. गोवा सरकारने यास मुंबई उच्च न्यायालयात आव्हान दिले होते. मुंबई उच्च न्यायालयाने गोवा सत्र न्यायालयाचा निर्दोष मुक्ततेचा निकाल रद्द करताना तेजपाल यांना १० वर्षांच्या  सक्त कारावासाची शिक्षा सुनावली होती.