ब्रेकिंग

शैक्षणिक

एमपीएससीतर्फे राज्यसेवा मुख्य परीक्षा 2025 च्या लेखी परीक्षेचा निकाल जाहीर

Wrutuja pandharpure
26 Aug 2026

पुणे : महाराष्ट्र लोकसेवा आयोगातर्फे (एमपीएससी)राज्य सेवा मुख्य परीक्षा-2025च्या लेखी परीक्षेचा निकाल जाहीर करण्यात आला. या परीक्षेतून एकूण 438 उमेदवारांना मुलाखतीसाठी पात्र ठरवण्यात आले आहे. त्यात सर्वाधिक पुण्यातील उमेदवारांचा समावेश आहे. वर्णनात्मक पद्धतीने झालेली ही पहिलीच लेखी परीक्षा असल्याने या परीक्षेच्या निकालाकडे राज्यभरातील उमेदवारांचे लक्ष लागले होते.

एमपीएससीने या बाबतची माहिती प्रसिद्धिपत्रकाद्वारे दिली. एमपीएससीने राज्यसेवा मुख्य परीक्षा वर्णनात्मक पद्धतीने घेण्याचा निर्णय 2022मध्ये घेतला होता. मात्र, उमेदवारांनी वर्णनात्मक पद्धती लगेच लागू करण्यास विरोध केला, राज्यभरात त्याबाबत आंदोलने झाली. त्यामुळे एमपीएससीने 2025पासून वर्णनात्मक पद्धतीने राज्यसेवा मुख्य परीक्षा आयोजित करण्याचा निर्णय घेतला. त्यानुसार राज्यसेवा मुख्य परीक्षा 5 एप्रिल ते 2 मे या कालावधीत घेण्यात आली होती.

एमपीएससीने दिलेल्या माहितीनुसार, परीक्षेच्या जाहीर केलेल्या निकालानुसार मुलाखतीसाठी प्रथमदर्शनी पात्र ठरलेल्या सर्व उमेदवारांना त्यांच्या परीक्षेच्या अर्जातील दाव्यांच्या पृष्ठर्थ मुलाखतीच्या वेळी त्यांची पात्रता मूळ प्रमाणपत्रावरून तपासण्याच्या अटीच्या अधीन राहून मुलाखतीस बोलावण्यात येत आहे. उमेदवारांनी अर्जात दिलेली माहिती खोटी अथवा चुकोचो आढळून आल्यास, दाव्यानुसार आवश्यक मूळ प्रमाणपत्रांची पूर्तता मुलाखतीवेळी न केल्यास, तसेच अधिसूचनेतील तरतूदीनुसार दावे तपासताना, अन्य कारणामुळे अपात्र ठरणार्‍या संबंधित उमेदवारांची उमेदवारी, कोणात्याही टप्यावर रद्द करण्यात येईल, असे स्पष्ट करण्यात आले आहे.

लेखी परीक्षेच्या निकालाआधारे मुलाखतीस पात्र ठरलेल्या उमेदवारांचा मुलाखत कार्यक्रम स्वतंत्रपणे प्रसिद्ध करण्यात येईल. मुलाखतीस पात्र उमेदवारांपैकी केवळ दिव्यांग उमेदवारांची वैद्यकीय तपासणी मुलाखतीपूर्वी करण्यात येणार आहे. दिव्यांग उमेदवारांनी मुलाखतीस उपस्थित राहताना वैद्यकीय चाचणी पूर्ण केल्याचा पुरावा सादर करणे आवश्यक राहील. उमेदवारांना वैद्यकीय चाचणी तारीख, ठिकाण लवकरच कळविण्यात येईल. मुख्य परीक्षमधून मुलाखतीसाठी पात्र न ठरलेल्या उमेदवारांना त्यांच्या गुणांची फेरपडताळणी करायची असल्यास 10 दिवसांत एमपीएससीकडे ऑनलाइन अर्ज करणे आवश्यक आहे. जाहीर करण्यात आलेला निकाल आरक्षणाच्या, समांतर आरक्षणाच्या तसेच अन्य मुद्यांत विविध न्यायालय, न्यायाधिकरणात दाखल न्यायिक प्रकरणातील अंतिम निर्णयाच्या अधीन राहून प्रसिध्द करण्यात येत असल्याचे नमूद करण्यात आले आहे.

विभागनिहाय मुलाखतीसाठी पात्र ठरलेले उमेदवार

अमरावती....................15

छत्रपती संभाजीनगर........32

नागपूर........................21

नाशिक.......................28

नवी मुंबई.....................26

पुणे..........................296