ब्रेकिंग

महाराष्ट्र

नाशिक विभागातील आपत्तीग्रस्त शेतकर्‍यांना ८६ कोटींची मदत

Samruddhi Dhayagude
26 Aug 2026

मुंबई,(प्रतिनिधी) : मागील वर्षीच्या खरीप हंगामात जून ते ऑक्टोबर या कालावधीत नैसर्गिक आपत्तीने नुकसान झालेल्या नाशिक महसूल विभागातील पात्र शेतकर्‍यांना ८६ कोटी ६५ लाखांच्या मदतीचा विशेष निधी मंजूर करण्यात आला असल्याची माहिती मदत आणि पुनर्वसन मंत्री मंत्री मकरंद जाधव-पाटील यांनी मंगळवारी दिली. नाशिक, अहिल्यानगर आणि जळगाव जिल्ह्यांतील नुकसानग्रस्त शेतकर्‍यांच्या बँक खात्यात मदतीची रक्कम जमा करण्यात येणार आहे.

नाशिक, अहिल्यानगर आणि जळगाव जिल्ह्यांमध्ये नैसर्गिक आपत्तीमुळे बाधित झालेल्या पात्र शेतकर्‍यांना विशेष बाब म्हणून मदतीचा निधी उपलब्ध करून देण्यास राज्य सरकारने मंजुरी दिली आहे. पात्र लाभार्थ्यांची माहिती निश्चित करून मदत वाटपाची प्रक्रिया पारदर्शक पद्धतीने राबविण्याचे निर्देश संबंधित जिल्हा प्रशासनाला देण्यात आल्याचे जाधव-पाटील यांनी सांगितले. या निर्णयामुळे आपत्तीग्रस्त पात्र शेतकर्‍यांना मोठा आर्थिक दिलासा मिळणार असून, पुढील शेती हंगामासाठी त्यांना आधार होणार आहे. कोणताही पात्र शेतकरी मदतीपासून वंचित राहणार नाही, याची दक्षता घेण्यात यावे, असे निर्देश देण्यात आले आहेत. मदत आणि पुनर्वसन विभागाने काल यासंदर्भातील शासन निर्णय जारी केला.