ब्रेकिंग

महाराष्ट्र

केज, किनवट, सिल्लोडमध्ये नवीन न्यायालये

Samruddhi Dhayagude
05 Aug 2026

पिंपरी-चिंचवडला विशेष मोटार वाहन न्यायालय

मुंबई, (प्रतिनिधी) : छत्रपती संभाजीनगर जिल्ह्यातील सिल्लोड, तसेच नांदेड जिल्ह्यातील किनवट येथे जिल्हा व अतिरिक्त सत्र न्यायालयासह सरकारी वकील कार्यालय, तसेच बीड जिल्ह्यातील केज येथे दिवाणी न्यायाधीश वरिष्ठ स्तर न्यायालय स्थापन करण्यास मंगळवारी मंत्रिमंडळ बैठकीत मान्यता देण्यात आली. यासाठी अतिरिक्त पदनिर्मितीला व त्यासाठीच्या खर्चाला मान्यता देण्यात आली आहे.

पिंपरी-चिंचवड (जि. पुणे) येथे विशेष मोटार वाहन न्यायालय स्थापन करण्यासही मंत्रिमंडळाच्या बैठकीत मंजुरी देण्यात आली.पिंपरी-चिंचवड येथील प्रलंबित प्रकरणांची संख्या लक्षात घेता विशेष मोटार वाहन न्यायालय स्थापन करण्याचा प्रस्ताव प्रधान जिल्हा आणि सत्र न्यायाधीश यांनी सादर केला होता. त्यावर उच्च न्यायालयाच्या समितीनेही शिफारस केली. त्यानुसार काल न्यायालय स्थापन करण्यास आवश्यक पदांना आणि त्यासाठी येणार्‍या खर्चास मंजुरी देण्यात आली.मोटार वाहन न्यायालय, जिल्हा न्यायालय, पुणे येथे १ लाख २० हजार १२८ प्रकरणे प्रलंबित आहेत. यापैकी, ४७ हजार ८०६ प्रकरणे पिंपरी-चिंचवडमधील आहेत.