ब्रेकिंग

विदेश

घुसखोरांना आता युरोपात ‘नो एन्ट्री’

Wrutuja pandharpure
04 Aug 2026

22 देशांचा नवा सीमा सुरक्षा आराखडा

ब्रुसेल्स : स्पेनमधील सेउता येथे निर्माण झालेल्या घुसखोरीच्या संकटानंतर युरोपियन महासंघाने बेकायदेशीर स्थलांतरांविरोधात कारवाई सुरू केली आहे. 27 पैकी 22 सदस्य देशांनी सीमा सुरक्षा अधिक कडक करण्यासाठी आणि बेकायदेशीर घुसखोरी रोखण्यासाठी नव्या ‘प्रवेश बंदी’धोरणाची मागणी केली आहे. या प्रस्तावावर उद्या (मंगळवारी) होणार्‍या गृहमंत्र्यांच्या बैठकीत चर्चा होणार असून, इटली, जर्मनी आणि ब्रिटनसह अनेक देश या कठोर भूमिकेच्या बाजूने आहेत. मात्र, स्पेनसह पाच देशांनी या प्रस्तावाला विरोध दर्शविला आहे.

घुसखोरी रोखण्यासाठी सहा स्तरांवरील कृती आराखडा तयार करण्यात येत आहे. त्यामध्ये महासंघाच्या बाह्य सीमांचे संरक्षण मजबूत करणे, फ्रंटेक्स या सामायिक सीमा सुरक्षा दलातील अधिकार्‍यांची संख्या वाढवणे, मोरोक्कोसारख्या ट्रान्झिट देशांसोबत सहकार्य वाढवणे, मानवी तस्करी करणार्‍या टोळ्यांविरुद्ध संयुक्त कारवाई करणे, आश्रयाचा अर्ज फेटाळलेल्या स्थलांतरितांना तातडीने मायदेशी पाठवणे आणि आवश्यकतेनुसार अंतर्गत सीमांवर तात्पुरती तपासणी सुरू करणे या उपायांचा समावेश आहे.

फ्रंटेक्सच्या आकडेवारीनुसार, 2009 ते 2025 या कालावधीत चार प्रमुख सागरी मार्गांद्वारे 35.25 लाख बेकायदेशीर स्थलांतरितांनी युरोपात प्रवेश केला. यामध्ये पूर्व भूमध्य मार्गावर 17.81 लाख, मध्य भूमध्य मार्गावर 13.03 लाख, पश्‍चिम भूमध्य मार्गावर 2.65 लाख आणि अटलांटिक-कॅनरी मार्गावर 1.76 लाख प्रवेशांची नोंद झाली आहे.

आफ्रिकन देशांतील घुसखोरांची संख्या सर्वाधिक

2025 मध्ये युरोपियन महासंघामध्ये 7.19 लाख बेकायदेशीर स्थलांतरित आढळले. त्यामध्ये अल्जेरियाचे 71 हजार 15 नागरिक सर्वाधिक असून, अफगाणिस्तान 42 हजार 750 आणि मोरोक्को 39 हजार 50 अनुक्रमे दुसर्‍या व तिसर्‍या क्रमांकावर आहेत. अल्जेरिया आणि मोरोक्को या दोन आफ्रिकी देशांतील नागरिकांचा एकूण घुसखोरीत15 टक्के वाटा असल्याचे नमूद करण्यात आले आहे.