ब्रेकिंग

एमबीबीएसचा विद्यार्थी पंधरा दिवसांपासून बेपत्ता

Wrutuja pandharpure
03 Aug 2026

वसतिगृहावर रॅगिंग झाल्याचा आरोप

पोलिसांकडून शोध सुरू

पुणे : बायरामजी जीजीभॉय (बीजे) मेडिकल कॉलेजमध्ये एमबीबीएसच्या प्रथम वर्षाचे शिक्षण घेणारा विद्यार्थी गेल्या पंधरा दिवसांपासून बेपत्ता आहे. वरिष्ठ विद्यार्थ्यांकडून वारंवार होणार्‍या रॅगिंगला कंटाळून त्याने वसतिगृह सोडल्याचा आरोप त्याच्या कुटुंबीयांनी केला आहे. या आरोपांची चौकशी करण्यासाठी कॉलेजने सहा सदस्यांची समिती स्थापन केली असून पोलिसही विद्यार्थ्याचा शोध घेण्याचे प्रयत्न करत आहेत.बेपत्ता विद्यार्थ्याचे नाव तन्मय वंगे असे आहे. त्याचे वडील अजयकुमार वंगे यांनी पोलिस आणि कॉलेज प्रशासन या दोघांकडेही तक्रार दाखल केली आहे. उत्कर्ष सिंग आणि श्रेया यादव यांच्यासह विद्यार्थ्यांच्या एका ग्रुपने तन्मयचा छळ केल्याचा आरोप त्यांनी केला आहे. मेडिकल कॉलेजमध्ये प्रवेश मिळाल्यानंतर तन्मयच्या ग्रामीण पार्श्‍वभूमीवरुन त्याची वारंवार थट्टा आणि अपमान केला जात असल्याचा दावा पालकांनी केला आहे.

पोलिस अधिकार्‍यांनी सांगितले की, 18 जुलै रोजी हॉस्टेल सोडण्यापूर्वी तन्मयने वसतिगृह प्रशासनाला कळवले होते की तो नातेवाईकांना भेटायला जात आहे. नंतर सीसीटीव्ही फुटेजमध्ये तो पुणे रेल्वे स्थानकावरुन सोलापूरकडे जाणार्‍या ट्रेनमध्ये चढताना दिसला. लोणी काळभोर रेल्वे स्थानक ओलांडल्यानंतर त्याचा मोबाइल संपर्क क्षेत्राच्या बाहेर असल्याचे पोलिसांनी सांगितले. 21 आणि 23 जुलै रोजी त्याच्या दूरध्वनीवर इंटरनेटचा वापर झाल्याचे दिसून आले, परंतु त्यानंतर कोणताही संपर्क होऊ शकलेला नाही. कुटुंबीयांच्या आरोपांनंतर बीजे मेडिकल कॉलेजने कथित रॅगिंग प्रकरणाच्या चौकशीसाठी सहा सदस्यीय समिती स्थापन केली. तन्मयचे पिता अजयकुमार वंगे यांनी दावा केला की, समितीचा अहवाल अद्याप कुटुंबीयांना कळवण्यात आलेला नाही. तसेच, या संस्थेत आपल्या मुलांना रॅगिंगचा सामना करावा लागल्याबाबत इतर अनेक पालकांनीही तक्रारी केल्याचे त्यांचे म्हणणे आहे.

तन्मयची आई रुग्णालयात

तन्मय बेपत्ता होण्याच्या घटनेचा कुटुंबावर मोठा परिणाम झाला आहे. या घटनेमुळे आलेल्या तणावामुळे तन्मयच्या आईला रुग्णालयात दाखल करण्यात आल्याचे समजते. बीजे मेडिकल कॉलेजवर यापूर्वीही रॅगिंगचे आरोप झाले आहेत. गेल्या वर्षी, एका निवासी डॉक्टरचे रॅगिंग केल्याच्या आरोपावरून तीन निवासी डॉक्टरांना निलंबित करण्यात आले होते.