ब्रेकिंग

महाराष्ट्र

श्री महागणपती मंदिरात भाविकांची गर्दी

Wrutuja pandharpure
03 Aug 2026

रांजणगाव गणपती, (प्रतिनिधी) : अष्टविनायकापैकी एक असलेल्या श्री क्षेत्र रांजणगाव गणपती (ता.शिरुर) येथील श्री महागणपतीच्या दर्शनासाठी भाविकांची अलोट गर्दी केली होती. यावेळी भाविकांनी गणपती बाप्पा मोरया, मंगलमूर्ती मोरया चा जयघोष करण्यात आला. मंदिर सुशोभीकरण कामांमुळे साडेतीन महिन्यानंतर भाविकांना दर्शनासाठी खुले झालेले मंदिर, रविवारची साप्ताहिक सुट्टी व संकष्टी चतुर्थी यामुळे पहाटेपासूनच भाविकांनी दर्शनासाठी प्रचंड गर्दी केली होती.

संकष्टी चतुर्थी निमित्त पहाटे 5 वाजता श्रींचा अभिषेक करून मंदिर भाविकांसाठी खुले करण्यात आले. संकष्टी चतुर्थी श्री क्षेत्र रांजणगाव गणपती देवस्थान ट्रस्ट अयोजनाने सामूहिक अथर्वशीर्ष पठण कार्यक्रम आयोजित करण्यात आला होता. यावेळी महिलांसह भाविक मोठया संख्येने उपस्थित होते.भाविकांसाठी उत्तम प्रकारे जलद दर्शन व्यवस्था, पिण्याचे पाणी, पावसाचे प्रमाण जास्त प्रमाणात असल्यामुळे भाविकांसाठी मंडप व्यवस्था इत्यादी सुविधा देवस्थान ट्रस्टतर्फे देण्यात आल्या, अशी माहिती देवस्थान ट्रस्टच्या अध्यक्षा स्वाती पाचुंदकर यांनी दिली.

संकष्टी चतुर्थी निमित्त रविवारी दुपारी 12 वाजता देवस्थान ट्रस्टचे मुख्य विश्वस्त ओमकार देव यांच्या हस्ते महापूजा व महानैवेद्य करण्यात आला. गणेशभक्त व येथील प्रगतिशील शेतकरी नानासाहेब दिनकरराव पाचुंदकर यांच्या वतीने मंदिर गाभार्‍यात व देवस्थान ट्रस्टच्या वतीने संपूर्ण मंदिराला विविध रंगी आकर्षक फुलांची सजावट करण्यात आली. दुपारी येथील श्री महागणपती भजनी मंडळ यांचा भजनाचा कार्यक्रम झाला.

यावेळी देवस्थान ट्रस्टचे मुख्य विश्वस्त डॉ.ओमकार देव, अध्यक्षा स्वाती पाचुंदकर, उपाध्यक्ष संदिप दौंडकर, सचिव डॉ. तुषार पाचुंदकर, खजिनदार विजय देव, राजमुद्रा पतसंस्थेचे अध्यक्ष दत्तात्रय पाचुंदकर, व्यवस्थापक बाळासाहेब गोर्‍हे, पांडुरंग चोरगे, हिशोबणीस संतोष रणपिसे, जनसंपर्क अधिकारी रमाकांत शेळके तसेच देवस्थान कर्मचारी उपस्थित होते. दरम्यान, चतुर्थीमुळे मंदिर व परिसरात रांजणगाव एमआयडीसी पोलिस ठाण्याचे पोलिस निरीक्षक कुमार कदम यांच्या नेतृत्वाखाली चोख पोलिस बंदोबस्त ठेवण्यात आला होता.