ब्रेकिंग

अर्थ

आयसीआयसीआय प्रुडेन्शियल बीएसई इन्शुरन्स ईटीएफ

Wrutuja pandharpure
03 Aug 2026

अंतरा देशपांडे , antara@kalyanicapital.com

’आयसीआयसीआय प्रुडेन्शियल बीएसई इन्शुरन्स ईटीएफ’ हा भारतातील विमा क्षेत्रातील पहिला ’एक्सचेंज-ट्रेडेड फंड’ (ईटीएफ) आहे; हा फंड ’बीएसई इन्शुरन्स इंडेक्स’चा मागोवा घेतो. मागच्याच आठवड्यात म्हणजे 20 जुलै ते 28 जुलै 2026 या कालावधीतील त्याच्या एनएफओ बाजारात आला होता.वाढती जागरूकता, विस्तारणारी वितरण व्यवस्था, अनुकूल नियामक घडामोडी आणि विमा उत्पादनांची वाढती मागणी यांच्या जोरावर, भारतातील विमा क्षेत्र देशाच्या आर्थिक परिसंस्थेचा एक अविभाज्य भाग बनले आहे. विम्याचा प्रसार जसजसा वाढत जाईल, तसतसे हे क्षेत्र दीर्घकालीन विकासाच्या संधी उपलब्ध करून देऊ शकेल. बीएसई इन्शुरन्स इंडेक्समध्ये (विमा निर्देशांक) विमा क्षेत्रातील अशा कंपन्यांचा समावेश होतो ज्या ’बीएसई 1000’ च्या कक्षेत येतात; हा निर्देशांक एका पूर्व-निर्धारित पद्धतीद्वारे विमा क्षेत्राची वाटचाल आणि कामगिरी दर्शवण्याचा प्रयत्न करतो. ही योजना गुंतवणूकदारांना भारतातील विमा क्षेत्रात गुंतवणूक करण्याची संधी देऊ शकते.

प्रमुख वैशिष्ट्ये

1) ’ट्रॅकिंग एरर’च्या अधीन राहून बीएसई इन्शुरन्स इंडेक्सचा मागोवा घेण्याचा प्रयत्न करणारा हा एक्सचेंज ट्रेडेड फंड आहे.

2) एकाच गुंतवणुकीद्वारे भारतातील विमा क्षेत्रातील अनेक कंपन्यांमध्ये गुंतवणूक करण्याची संधी मिळते.

3) या निर्देशांकामध्ये अशा विमा कंपन्यांचा समावेश आहे ज्या ’बीएसई 1000’ या श्रेणीचा भाग आहेत; निर्देशांकाच्या कार्यपद्धतीनुसार, ही श्रेणी बीएसईवरील पूर्ण बाजार भांडवलाच्या आधारावर शीर्ष 1,000 सूचीबद्ध कंपन्यांचे प्रतिनिधित्व करते.

4) हा ईटीएफ बीएसई इन्शुरन्स इंडेक्समधील कंपन्यांमध्येच आणि त्याच प्रमाणात गुंतवणूक करण्याचे उद्दिष्ट ठेवतो.

5) निर्देशांकातील घटकांना त्यांच्या फ्लोट-समायोजित बाजार भांडवलानुसार भारित केले जाते, ज्यावर प्रत्येक शेअरच्या भाराची 25% ची मर्यादा आहे, आणि निर्देशांक पद्धतीनुसार त्यांचे वेळोवेळी पुनरावलोकन व पुनर्संतुलन केले जाईल.

कोणी गुंतवणूक करावी?

आयसीआयसीआय प्रुडेन्शिअल बीएसई इन्शुरन्स इटीएफ अशा गुंतवणूकदारांसाठी योग्य आहे, जे दीर्घकालीन संपत्ती निर्मिती, भारतीय विमा क्षेत्रातील ’थीमॅटिक’ (विशिष्ट क्षेत्रावर आधारित) गुंतवणूक आणि अत्यंत उच्च जोखीम असलेला पॅसिव्हली मॅनेज्ड (निष्क्रियपणे व्यवस्थापित) एक्सचेंज-ट्रेडेड पर्याय शोधत आहेत. जे अनुभवी गुंतवणूकदार आहेत आणि ज्यांच्याकडे इतर सर्व श्रेणीत विविधीकरण आहे आणि ज्यांना इन्शुरन्स या क्षेत्रात विशेष गुंतवणूक करायची इच्छा आहे त्यांनी या फंडाचा विचार करायला हरकत नाही. बाजारात नव्याने प्रवेश केलेले असे गुंतवणूकदार ज्यांनी अद्याप ’स्टँडर्ड इक्विटी फंड्स’चा भक्कम आणि वैविध्यपूर्ण पाया उभारलेला नाही त्यांनी यात सध्यातरी गुंतवणूक टाळायला हरकत नाही. तसेच ज्यांना त्वरीत नफा हवा आहे त्यांच्यासाठी हे योग्य नाही, कारण क्षेत्रीय संकल्पनांचे परिणाम दिसून येण्यासाठी वेळ लागतो आणि त्यात चढ-उतारही जास्त असतात. अर्थातच आपल्या सल्लागाराशी चर्चा करूनच योग्य तो निर्णय घ्यावा.