ब्रेकिंग

क्रीडा

राष्ट्रकुल पदकवीरांचे मायदेशी जल्‍लोषात स्वागत

Wrutuja pandharpure
03 Aug 2026

नवी दिल्ली : राष्ट्रकुल क्रीडा स्पर्धेत उल्लेखनीय कामगिरी करणार्‍या भारतीय खेळाडूंच्या पहिल्या तुकडीचे रविवारी मायदेशी आगमन झाल्यानंतर इंदिरा गांधी आंतरराष्ट्रीय विमानतळावर शेकडो चाहत्यांनी त्यांचे जल्लोषात स्वागत केले. या तुकडीत स्टार वेटलिफ्टर मीराबाई चानू, लवप्रीत सिंग यांच्यासह अनेक पदकविजेत्यांचा समावेश होता.

महिलांच्या 49 किलो वजनी गटात सलग तिसरे राष्ट्रकुल सुवर्णपदक पटकावणार्‍या ऑलिम्पिक पदकविजेत्या मीराबाई चानू म्हणाल्या, मी मणिपूरची असल्याचा आणि देशासाठी काहीतरी मोठे करण्याची संधी मिळाल्याचा मला खूप अभिमान आहे. पुरुषांच्या 109 किलोपेक्षा अधिक वजनी गटात अवघ्या एका किलोच्या फरकाने सुवर्णपदक हुकून रौप्यपदक जिंकणार्‍या लवप्रीत सिंगने आता आपले लक्ष्य जपानमध्ये होणार्‍या आशियाई क्रीडा स्पर्धेकडे असल्याचे सांगितले.

पंजाबच्या 28 वर्षीय लवप्रीतने सांगितले, भारतीय नौदल, माझे कर्णधार विजय कुमार आणि स्वागतासाठी विमानतळावर आलेल्या सर्वांचे मी आभार मानतो. लवप्रीतने एकूण 388 किलो वजन उचलले. यामध्ये ’स्नॅच’ प्रकारात 176 किलो वजन उचलून राष्ट्रकुल स्पर्धेचा नवा विक्रमही प्रस्थापित केला. तो म्हणाला, सुवर्णपदक हुकल्याचे दुःख आहे, पण मी कठोर मेहनत केली आणि त्याचे फळ मिळाले.