ब्रेकिंग

वाहनांच्या नूतनीकरणाची सुविधा सुट्टीच्या दिवशीही सुरू राहणार

Wrutuja pandharpure
01 Aug 2026

पुणे : वाहनांचे योग्यता (फिटनेस) प्रमाणपत्र नूतनीकरण वेळेत पूर्ण व्हावे आणि वाहन चालक-मालकांची गैरसोय टाळावी, यासाठी मौजे दिवे येथील कार्यालयात आज (शनिवार) आणि उद्या (रविवार) या शासकीय सुट्टीच्या दिवशीही कामकाज सुरू ठेवण्यात येणार आहे.या दोन दिवसांत ’प्रथम येणार्‍यास प्रथम प्राधान्य’ या तत्त्वावर दररोज 100 वाहनांसाठी कोटा उपलब्ध करून देण्यात आला आहे. त्यामुळे वाहन चालक, मालक तसेच विविध वाहन संघटनांनी आपल्या वाहनांचे योग्यता प्रमाणपत्र नूतनीकरण करण्यासाठी दिवे येथील कार्यालयात वाहने सादर करावीत, असे आवाहन करण्यात आले आहे.

विशेषतः स्कूल बस चालक आणि मालकांनी आपल्या बसची तपासणी करून योग्यता प्रमाणपत्राचे नूतनीकरण करून घ्यावे. विद्यार्थ्यांच्या सुरक्षेच्या दृष्टीने स्कूल बस वाहनांना फिटनेस प्रमाणपत्र नूतनीकरणासाठी प्राधान्य दिले जाणार असल्याची माहिती प्रशासनाकडून देण्यात आली आहे. जिल्ह्यातील वाहनधारकांनी या विशेष सुविधेचा लाभ घेऊन आपल्या वाहनांचे योग्यता प्रमाणपत्र वेळेत नूतनीकरण करून घ्यावे, असे आवाहन प्रशासना केले आहे.