ब्रेकिंग

देश

बांकीपूरमध्ये 34 टक्के मतदान

Wrutuja pandharpure
31 Jul 2026

पाटणा : बिहारच्या बांकीपूर विधानसभा मतदारसंघाच्या पोटनिवडणुकीत गुरूवारी सरासरी 34 टक्के मतदान झाले. भाजपचे राष्ट्रीय अध्यक्ष नितीन नबीन यांनी आमदारकीचा राजीनामा दिल्याने बांकीपूरमध्ये पोटनिवडणूक होत आहे. सोमवारी मतमोजणीनंतर निकाल जाहीर केला जाणार आहे.

या निवडणुकीत 30 उमेदवार रिंगणात आहेत. मात्र, प्रत्यक्ष लढत ’जन सुराज’चे संस्थापक प्रशांत किशोर आणि भाजप उमेदवार नीरज कुमार सिन्हा यांच्यात आहे. नितीन नबीन यांनी बांकीपूरचे पाच वेळा प्रतिनिधित्व केले आहे. ते राज्यसभेवर निवडून गेल्याने ही जागा रिकामी झाली. भाजपने अभिषेक कुमार यांना उमेदवारी जाहीर केली होती. मात्र, अभिषेक यांनी ऐनवेळी माघार घेतली. त्यामुळे भाजपने नीरज यांना उमेदवारी दिली. मागील वर्षी नोव्हेंबरमध्ये पार पडलेल्या बिहार विधानसभा निवडणुकीत प्रशांत किशोर यांच्या पक्षाला आपला करिष्मा दाखवता आला नव्हता. त्यामुळे प्रशांत किशोर यांच्यासाठी ही निवडणूक प्रतिष्ठेची मानली जात आहे.

काल सकाळी सात वाजता मतदानास सुरूवात झाली. पहिल्या सहा तासांत केवळ 20.01 टक्के मतदानाची नोंद झाली होती. दरम्यान, प्रशांत किशोर यांनी सत्ताधारी पक्षाच्या सांगण्यावरून पोलिसांनी आपल्या समर्थकांना चुकीच्या पद्धतीने ताब्यात घेतल्याचा आरोप केला. आतापर्यंत 16 हून अधिक जन सुराज कार्यकर्त्यांना पोलिसांनी ताब्यात घेतले असल्याचे त्यांनी सांगितले. भाजप खासदार रविशंकर प्रसाद, भाजपचे ज्येष्ठ नेते सी. पी. ठाकूर, त्यांचे पुत्र आणि नवादाचे खासदार विवेक ठाकूर आदींनी मतदानाचा हक्क बजावला.