ब्रेकिंग

देश

संसद परिसरात विरोधकांची निदर्शने

Wrutuja pandharpure
31 Jul 2026

नवी दिल्ली : विद्यार्थ्यांवरील पोलिस कारवाई आणि अयोध्येतील राम मंदिरातील देणगी चोरी विरोधात संसद परिसरात विरोधी पक्षाच्या खासदारांनी गुरूवारी निदर्शने केली. या आंदोलनात काँग्रेस नेत्या प्रियांका गांधी, पक्षाचे सरचिटणीस के.सी. वेणुगोपाल, समाजवादी पक्षाचे धर्मेंद्र यादव, तृणमूल काँग्रेसच्या सागरिका घोष, झारखंड मुक्ती मोर्चाच्या महुआ मांझी यांसह विरोधी पक्षाचे सदस्य उपस्थित होते. संसदेच्या मकर द्वारासमोर हे आंदोलन करण्यात आले.

यावेळी केंद्र सरकारविरोधात घोषणा देण्यात आल्या. तसेच, एक प्रतिकात्मक दान पेटी ठेवण्यात आली होती. या दान पेटीत देणगी चोरीचा निषेध म्हणून विरोधी पक्षाचे खासदार पैसे टाकताना दिसत होते.विद्यार्थ्यांवर पेलेट गन वापराचे आदेश कोणी दिले? लोकसभेतील विरोधी पक्षनेते राहुल गांधी यांना सभागृहात बोलण्यापासून का रोखण्यात आले? याबाबत केंद्र सरकारने उत्तर द्यावे, अशी मागणी विरोधी पक्षाच्या खासदारांनी केली.सध्या संसदेचे हिवाळी अधिवेशन सुरू आहे. मागील संपूर्ण आठवडा हा विरोधकांच्या गदारोळामुळे वाया गेला. परीक्षा सुधारणा विधेयकावरील चर्चेव्यतिरिक्त सभागृहांत फारशी चर्चा होऊ शकली नाही.