ब्रेकिंग

नदीकाठ सुधार योजना म्हणजे मेकअप : आदित्य ठाकरे

Samruddhi Dhayagude
31 Jul 2024

पुणे : नदीकाठ सुधार योजना म्हणजे केवळ मेकअप असून, यात मुळा-मुठा नदीचे सिमेंटचे बकेट तयार केले जात आहे, अशी टिका शिवसेनेचे नेते आदित्य ठाकरे यांनी केली आहे. हा प्रकल्प रद्द करणे गरजेचे असून, सर्वच पक्षांनी संवेदनशीलपणा दाखवित एकत्रितपणे या प्रकल्पावर विचार करणे आवश्यक असल्याचेही त्यांनी नमूद केले.

गेल्या आठवड्यात आलेल्या पुराच्या पार्श्वभूमीवर आदित्य ठाकरे यांनी सिंहगड रस्ता भागातील पूरबाधित भागाला भेट दिली. तेथे नागरीकांशी चर्चा केली. यानंतर पुणे श्रमिक पत्रकार भवन येथे आयोजित पत्रकार परिषदेत आदित्य ठाकरे यांनी नदीकाठ सुधार योजनेतील त्रुटी आणि त्याचे परिणाम याविषयावर भाष्य केले. यावेळी पर्यावरणप्रेमी सारंग यादवाडकर यांनी सादरीकरण करून नदीकाठ सुधार प्रकल्प आणि मेट्रो प्रकल्प, अतिक्रमणे यामुळे मुठा नदीची वहन क्षमता कमी झाल्याचा दावा केला. यावेळी शिवसेनेचे संपर्क नेते सचिन आहिर, शहर प्रमुख गजानन थरकुड, संजय मोरे, माजी आमदार चंद्रकांत मोकाटे, महादेव बाबर, वसंत मोरे आदी उपस्थित होते.

पत्रकार परीषदेत आदित्य ठाकरे यांनी यादवाडकर यांनी केलेल्या सादरीकरणाचा उल्लेख करीत, नदीकाठ सुधार प्रकल्पाविषयी भुमिका स्पष्ट केली.

आमचा विकास कामांना विरोध नाही असे नमूद करीत, आदीत्य ठाकरे म्हणाले, "या प्रकल्पाचा कंटूर स्टडी केला पाहिजे. जगात कोठेही नदीसंदर्भात काम करताना नदीची खोली वाढविली जाते, तसेच तिची रुंदी वाढविली जाते. पण पुण्यात मात्र उलटेच होत आहे. या नदीतील पाणी आधी स्वच्छ करणे गरजेचे असताना, तीचे ब्युटीफिकेशन करण्याच्या नावाखाली केवळ मेक अप केला जात आहे. पुण्यात पात्र अरुंद केले जात असल्याने नदी ही सिमेंटचे बकेट होणार आहे, भविष्यात अशा पुरांचा धोका निर्माण होईल.”सदर प्रकल्पाला पर्यावरण प्रेमी, या क्षेत्रातील तज्ज्ञांकडून, प्रतिष्ठीत नागरीकांकडून विरोध केला जात आहे. राज्य सरकार यांचे म्हणणे न ऐकता हा प्रकल्प पुण्यावर लादत आहे, असा आरोप आदित्य ठाकरे यांनी केला.